Министерството за транспорт и градоначалникот на Ѓорче контра Арсовска
Министерството за транспорт и врски тврди дека не носи урбанистички планови и не се меша во развојот на општините, а градончалникот на Ѓорче Петров вели нема три нов хемиски фабрики, туку развој на постојната.
Овие одговори односно реакции се по обвинувања на градоначалничката на Град Скопје, Данела Арсовска, која смета дека во саботата донесениот ДУП во споменатата општина, е небезбеден и донесен со многу прекршувања на законите.
„Данела Арсовска да ги води политичките игри и пресметки на друго место и на други теми и да не го вовлекува Министерството за транспорт и врски во креирањето на урбанистичките планови кои согласно закон се во изворна надлежност на општините. Министерството за транспорт и врски не е институција која носи урбанистички планови, ниту пак се меша во просторниот развој на општните. Ако Данела Арсовска не го знае ова, нека се информира подобро од професионалци кои се занимаваат со оваа дејност“, се додава во реакцијата од ресорното министерство.
Според увидот што го направи Министерството за транспорт и врски во системот на е-урбанизам, јасно се гледа, како што велат, дека Град Скопје дури 72 дена не одговара на бараното мислење во однос на предметниот ДУП.
„Согласно член 36 став 4 од Законот за просторно и урбанистичко планирање, Град Скопје е должен да одговори во рок од пет работни дена од приемот на барањето во електорнска форма на системот на е-урбанизам. Доколку не одговори, тогаш се смета дека Град Скопје нема забелешки и дека е дадено позитивно мислење“ истакнуваат од министерството.
Потенцираат дека цели 72 дена, односно 51 работен ден Град Скопје не одговорил на барањето.
„Ако од Град Скопје сметале дека планот не треба да биде донесен, имале законска можност дури пет пати и 72 дена да се произнесат негативно. Исто така сакаме да информираме дека во текот на постапката, Општината дури четири пати го доставила овој план до Минисерството за транспорт и врски, од кои три пати министерството даде известување со недостатоци, додека четвртиот пат општината ги корегира сите зададени забелешки. Согласно ваквиот тек на настаните, Комисијата за урбанизам при министерството за транспорт и врски водејќи се од одредбите на Законот за просторно и урбанистичко планирање како и од Законот за урбанистичко планирање даде согласност на ДУП-от“, се наведува во информацијата од министерството.
Потенцираат дека донесувањето на Урбаниситичките планови не е постапка која ја води Министерството за транспорт и врски, туку согласно домашната легислатива носењето е во надлежност на Советот на општината, односно советниците се тие кои го гласаат или не го гласаат урабнистичкиот план.
Министертвото за транспорт и врски, се додава во реакцијата, ќе продолжи да работи согласно законите во Северна Македонија и нема да дозволи поединци да го вовлекуваат во евтин политички фолклор.
„Апсолутно нема ниту една нова фабрика на постојната локација, туку е постоечката која има добиено многу помала развојна површина како што реков во првичното излагање, негде околу четири пати помала развојна површина од тоа што имала претходно и нема градба на нови капацитети од индустрија, лесна и не загадувачка како што е предвидено согласно генералниот урбанистички план на градот Скопје, ова денеска преку прес-конференција го истакна Александар Стојкоски во врска на прашањето дали во општината Ѓорче Петров ќе се градат три нови хемиски фабрики како што тоа го обвини градоначалничката на градот Скопје Данела Арсовска.
„Нас овој детален урбанистички план по сите параметри целосно ни е усогласен со генералниот урбанистички план, проблемот во градот е што не знаат да ги читаат плановите кои што самите си ги носат и треба наместо сабајле кога ќе станат да видат со кого ќе се расправаат денес да се фатат за сериозна работа, да седнат да си ги прочитаат ДУП-овите, да си ги прочитаат законите и да не не оставаат на милост и немилост, особено граѓаните на градот Скопје“, вели Стојкоски.