Министерот Исмаили се сретна со координаторот на програмската канцеларија на ТИКА, Ајтекин Ајден

Министерот за култура, Хусни Исмаили денеска се сретна со координаторот на програмската канцеларија на Турската агенција за соработка и координација (ТИКА) – Скопје, Ајтекин Ајден.

Како што соопшти Министерството за култура, Исмаили истакнал дека донациите на ТИКА и на Република Турција се потврда за поддршката и за одличната соработка со нашата земја во сите сфери, а особено во заштитата на културното наследство.

На средбата се разговарало и за идните можности за соработка меѓу Министерството за култура и ТИКА, како и за инвестициите и поддршката од ТИКА за националните установи од областа на културата.

-За да придонесе за зачувување на заедничкото историско наследство и за развој на
македонскиот културен туризам во земјава, ТИКА во изминатите години почна со реставрација на историското наследство и на многу џамии. Во изминатиот период, со поддршка од ТИКА, завршени се повеќе значајни проекти од областа на културата, меѓу кои и: реконструкцијата на Спомен-куќата на семејството на Кемал Ататурк во Коџаџик, конзервацијата на Мамут-ага џамија во Радање –
Карбинци, адаптацијата на Воска амам во Охрид во изложбен простор, конзервацијата на Турбето на Синан Челеби на Плаошник, Зејнел Абедин-паша теќе во Охрид – шадрван и партерно уредување, конзервацијата на Мустафа Челеби џамија во Струга, археолошките истражувања во Султан Муратовата џамија во Скопје, реновирањето на Спомен-собата на Кемал Ататурк во Битола, непосредна заштита на
Стариот амам во Тетово, конзервацијата на Мустафа-пашината џамија – Скопје и други проекти, се вели во соопштението од Министерството за култура.

На средбата била споделена и информацијата дека е во тек реставрацијата на Алаџа џамијата и Султан Муратовата џамија во Скопје, дека е завршена реставрацијата на Хусеин шах џамијата во Општина Сарај, додека, пак, за Арабати баба теќе во Тетово е во тек изработката на проект за негова реставрација.

Турската интернационална агенција за обнова и развој (ТИКА), која денеска има 61 канцеларија во 59 земји и реализира проекти во над 170 земји, во 2005 година ги почна своите активности во Република Северна Македонија каде што реализираше околу 1 000 проекти во повеќе сектори – од образованието до здравството, од социјално-културната соработка до земјоделството и сточарството – со буџет од 100
милиони долари.