Милошоски прашува каде завршиле шестте милиони евра од „бомбите“
Антонио Милошоски реагираше на вчерашните „бомби“ на кои се претпоставува дека е гласот на адвокатот Димишков, брат на судијката Димишкова. Тој прашува дали Зоран и Вице Заеви преку посредници ја трампале правдата за 6 милиони евра, иако според обвинителката Вилма Рускоска на снимката воопшто не се споменувале Заеви.
Имајќи го во предвид разврската на случајот „Рекет“ како и низа отворени прашања на оваа тема се поставува прашањето дали адвокатот Димишков имал само лична моќ да нуди притвори, ослободувања од притвори и да бара пари за ослободувања од притвори. Или пак можеби адвокатот Димишков имал и судска моќ и политичка моќ преку одреден спонзор за да може да издејствува кому да биде одредена мерка притвор и за колку пари да биде укината таа мерка притвор.Затоа многу сме зачудени што за адвокатот Димишков и за судијката Димишкова немало истрага во Јавното Обвинителство, во најмала рака за посредување и за уцена, или изнуда на пари од лица кои што биле предмет на обвиненијата на СЈО.
Главното прашање е дали и Вице и Зоран Заеви се ликовите во чие име зборува адвокатот Димишков, и дали адвокатот Димишков бара 6 милиони евра во име на Зоран и Вице Заеви.Дали тие се политичкиот центар на моќ каде што треба да се уплатат 6 милиони евра за да се укине одредена мерка притвор?
Очигледно е дека се правени пазари со правдата. Сестрата судијка определува мерка притвор. Братот адвокат наоѓа посредници, бара пари, има центар за политичка моќ, и тие пари ги добиваат главните нарачатели на ваквите дејствија, и даваат наредба за укинување на мерката притвор, рече Милошоски.
Од СДСМ одговорија дека ВМРО-ДПМНЕ е во паника бидејќи по “Рекет“ им е јасно дека правда и одговорност ќе има за секој којшто го прекршил законот.
-И покрај сите опструкции и блокади, не успеаја обидите на Христијан Мицкоски и на ВМРО-ДПМНЕ да го заштитат криминалот, правниот систем функционира, одговорност ќе има.Потврда за тоа добивме и од Стејт департментот на САД, од каде оценија дека во Северна Македонија нема толеранција за корупцијата, а злоупотребата на јавна функција за лична корист ќе биде соодветно казнета.Оттука е стравот на ВМРО-ДПМНЕ. Пола раководсто на партијата, заедно со бегалецот Никола Груевски ќе одговараат за сите злодела што ги направија.
Заврши времето на селективна правда, заврши времето на политички монтирани судски процеси.Следува целосна разрешница на сите случаи на СЈО, над триесет во коишто се вклучени и високи функционери на ВМРО-ДПМНЕ.Јавноста виде со кого претседателот на ВМРО-ДПМНЕ Мицкоски, „шурувал“. Зоран Милески – Кичеец му бил десна рака на Мицкоски, но и на Александар Николовски. Јасна е нивната поврзаност со случајот „Рекет“. Правдата ќе ги стигне и тоа многу скоро, порачаа од СДСМ.