Милевски го објави списокот за квалификациските мечеви со Црна Гора и Казахстан

Селекторот на македонската репрезентација до 21 година, Благоја Милевски го објави списокот со репрезентативци за натпреварите со Црна Гора (10. октомври) и Казахстан (15. октомври) од квалификациите за Европското првенство 2021. година.

Македонската фудбалска репрезентација до 21 година успешно ги започна квалификациите за ЕП со убедливата победа на домашен терен против Фарски Острови со 7:1 во Скопје.

„Ова се фудбалерите со кои ги отворивме квалификациите, списокот е тој, со исклучок на Марко Ѓоргиевски од Вождовац. Сега имаме појасна слика за нашиот потенцијал и улогата во овие квалификации. Со исклучок на Шпанија, сите останати селекции ќе бидеме во борба за второто место, а зошто да не и прво ако ни се укаже шанса. Противниците со кој ќе се соочиме на претстојните натпревари се квалитетни, но сега мислиме само на Црна Гора, а потоа на Казахстан. Одиме чекор по чекор, тоа е нашата филозофија, одиме да ја победиме Црна Гора. Противникот е квалитетен, физички се силни, играат цврст фудбал, технички дотеран. Поголем дел од нивните фудбалери се од домашното првенство, кое од година в година е сè посилно. Но сме одиграле неколку пријателски натпревари со нив и знаеме што не очекува. И покрај победата од 7:1 над Фарски Острови цврсто стоиме на земја“, истакна Благоја Милевски.