Мицотакис му порачал на Заев дека Грција е сојузник на Македонија
Двајцата премиери заклучиле дека Македонија веќе не смее да чека на европскиот пат
Договорот од Преспа донесе решенија кои значат пријателство, прогрес и економија, заклучија премиерот Зоран Заев со грчкиот колега Киријакос Мицотакис на средбата во владата во Атина. Како што соопшти владината прес-служба, премиерите на двете земји констатирале напредок во досегашното спроведување на обврските од Договорот од Преспа од двете страни и изразија посветеност за целосна и непречена натамошна имплементација.
Во однос на евроитеграциите премиерот Мицотакис, се наведува, му порачал на премиерот Заев дека Грција секогаш ќе биде сојузник на кој граѓаните на Република Северна Македонија можат да сметаат.
Заедничка беше констатацијата на премиерите дека Северна Македонија не може и не смее да чека понатаму на европскиот пат и дека претпристапните преговори со ЕУ треба да почнат час поскоро.
Земјата покажа дека има сериозен капацитет да склучува и исполнува договори за пријателство, заклучија Мицотакис и Заев, соопштуваат од Владата.
За време на разговорите било нагласено дека не е опција да се раздвојуваат Северна Македонија и Албанија од аспект на почнување на процесот на преговори со ЕУ.
Поголем дел од состанокот премиерите на двете земји го искористиле за разговор околу потенцијалите за економска соработка, како и за деловните можности кои произлегуваат од соработката меѓу стопанските комори од двете земји. Премиерот Мицотакис истакна дека поради економски и геополитички причини Грција сериозно ја поздравува и поддржува одлуката на Северна Македонија за инвестициите во гасните проекти Александруполи.
Мицотакис го известил Заев дека од утре, 14 мај, се отвора граничниот премин „Евзони“ за сите граѓани на Северна Македонија кои имаат негативен ПЦР тест, писмен доказ за примени две дози вакцина против Ковид-19 или позитивен резултат за антитела, стои во соопштението.
На средбата присуствуваа и вицепремиерите за европски и за економски прашања, Никола Димитров и Фатмир Битиќи, како и грчкиот министер за надворешни работи Никос Дендијас.