Мицкоски „загрижен“: СДСМ може ќе престане да постои, ВМРО-ДПМНЕ ќе остане само

Лидерот на ВМРО-ДПМНЕ и премиер, Христијан Мицкоски, изгледа дека е загрижен за судбината на опозицискиот СДСМ бидејќи поради едноцифрениот рејтинг постоела реална опасност партијата да не опстои по следните локални избори. Тој го обвини СДСМ за неконструктивност во процесот на евроинтеграциите и за политичка стратегија која водела кон самоуништување на партијата.

„Градиме, се бориме низ целиот свет, а тој (Венко Филипче) со една изјава вели – ‘јас прифаќам сѐ што ќе ми ставите на маса, само вратете ме на власт’. Тоа не е конструктивност, тоа е рушење. Затоа имаат едноцифрен рејтинг и мислам дека постои сериозна опасност дали таа политичка партија ќе продолжи да постои по локалните избори“, рече денеска Мицкоски по отворањето на реновираниот туристички комплекс „Македонско село“.

Тој го забележал кај Венко Филипче „предавничкиот, поданички и кодошки однос“

Мицкоски додаде дека политиката треба да биде во склад со чувствата и потребите на граѓаните, а не со „политички ќорци“.

На оваа изјава реагираше СДСМ со соопштение:

„Христијан Мицкоски продолжува да зборува како расипана плоча – без одговор на клучните прашања, без реален контакт со животот на граѓаните.

Врховизмот е врв на кодошлакот и предавство на сопствениот народ и од тоа не може да побегне. 

Нема поголем предавник од човек кој за една година ги задолжи граѓаните со над 7 милијарди евра, ја намали минималната плата и го доведе стандардот на најниско ниво во Европа, а тој да се луксузира со приватни авиони, да јаде папаја и манго, да се шета по најскапите хотели во светот на сметка на народот. Поголемо предавство од ова врз сопствениот народ – нема“.