Мицкоски: Точно е, мајка ми е позитивна на коронавирус, нема да се самоизолирам
Претседателот на опозициската ВМРО-ДПМНЕ Христијан Мицкоски при денешната посета во Струмица информираше дека неговата мајка е позитивна на вирусот Ковид-19, потенцирајќи дека тој не се видел со неа подолг период имајќи го предвид ризикот на кој е изложен поради секојдневните средби и разговори.
– Мајка ми е позитивна. Точно е, веќе неколку дена, ние се немаме видено. Направено е епидемиолошко интервју со нејзе. Луѓето кои биле во нејзина близина ќе бидат и се веќе во самоизолација. Јас подолг период се немам видено имајќи предвид ризикот на кој секојдневно сум изложен, бидејќи секојдневно се среќавам со луѓе и разговарам. За жал, точно е, таа веќе неколку дена, би рекол пет-шест дена е во домашни услови. И посакувам добро здравје. Ете и кај нас во семејството, за жал, ја почувствувавме директно ова пандемија и се надевам дека побргу ќе помине. Ни сме тука да и ги олесниме деновите што идат во борбата против овој вирус, изјави лидерот на ВМРО ДПМНЕ одговарајќи на новинарско прашање дали е точна информацијата дека неговата мајка е позитивна на коронавирусот при денешната посета на Струмица.
Додаде дека им посакува на сите граѓани многу здравје и да се чуваат, бидејќи, како што рече, тој како некои други политичари нема така лесно да ја реалативизирал таа работа, бидејќи вирусот е сериозен.
-Имајќи ја предвид неспособноста на Владата, имајќи ја предвид неспособноста на ресорниот министер да се справи со оваа пандемија и таа на дневна основа е се повеќе присутна меѓу нас. Но, и тоа е уште еден мотив повеќе за мене да излезам до 15 јули и да разговарам што е можно со повеќе сограѓани, да ги убедам на 15 јули да ја поразат оваа неспособна власт предводена од ова раководство на СДСМ и Зоран Заев, рече Мицкоски.