Мицкоски: Пописот да се одложи една година
Опозициската ВМРО-ДПМНЕ предлага одлагање на пописот за една година, по примерот на Германија, како и тргање на двата врзани потписи што, според нив, укажува дека оваа статистичка операција е всушност политичка. Претседателот на партијата, Христијан Мицкоски, изјави дека освен овие две работи, тие бараат и примена на читачи за отпечатоци на прсти за лицата кои постојано живеат во земјата.
„Затоа ВМРО-ДПМНЕ предлага прво, да го одложиме за една година. Имаме време до 2022 година, како што направи Германија е сосема доволна бидејќи немаме избори. Второ, бараме веднаш ако е статистичка операција да се тргнат двата врзани потписа затоа што еве јас ви гарантирам дека тие потписи значат политичка операција. Трето, за да докажеме кој е резидент бидејќи согласно Еуростат вие попишувате резиденти мора да бидат применети читачите на отпечатоци на прсти или т.н. фингерпринти кои согласно новиот Изборен законик се предвидени да бидат дел од следните локални избори во октомври 2021. Значи не е дополнителен трошок тие терминали секако мора да бидат набавени, а така ќе знаеме кои се присутни кои се отсутни“, рече Мицкоски во интервју за Нетпрес.
Лидерот на опозицијата вели дека доколку сето ова не биде прифатено, а засега на комисиска расправа ништо не е прифатено, и ако СДСМ продолжи со „насилна процедура, злоупотреба на европското знаменце, ВМРО-ДПМНЕ нема намера да ги признае резултати, напротив жестоко ќе ги отфрли“.
„Во периодот кој следи ќе работи на терен истите да ги девалвира, а доколу некој мисли дека ВМРО-ДПМНЕ ќе повика на непопишување не е така зошто постои казна глоба од 300-400 евра, ние тоа не можеме да го направиме. Затоа ВМРО-ДПМНЕ ќе работи на терен жестоко да ги девалвира, нема да ги признае резултатите од овој попис затоа што не постои доверба“, рече Мицкоски.
Тој вели дека одлука е на премиерот и лидер на СДСМ Заев дали ќе прифати политички или статистички попис, каде, како што вели, „ќе има мапирање за локалните избори за да може утре да носат вакви или такви подароци, за да ги плати активистите кои работат на избори“.
Според него, власта процесот за претстојниот попис го води скандалозно, нетранспаренто и погрешно и оти целта им е да спроведат политичка а не статистичка операција.