Мицкоски не знае дали ќе постигне решение за евроинтеграциите – не преговарал туку разговарал

Воспоставен е директен контакт меѓу кабинетите на Мерц и Макрон со мојот кабинет, вели Мицкоски

19/08/2026 22:09

Нема никаква дилема дека ќе разговараме, разговараме и сме разговарале со цел да бараме решение за евроинтеграциите. Прашањето е што разговарате и која е вашата црвена линија до која вие одите во тие разговори, изјави премиерот Христијан Мицкоски во интервју за телевизија Сител.

– Никој тоа не го спори, ниту пак некогаш досега некој тоа го спорел. Кога бев во Тиват, темите што јас ги разговарав со францускиот претседател Макрон и канцеларот на Германија Мерц, главна тема беше придвижувањето на овој процес и одблокирањето на кочницата што ја имаме пред нас. Така што не е нешто нелогично Владата да разговара. Прашањето е што разговарате и која е вашата црвена линија до која вие одите во тие разговори. Тоа е нашата задача и пред граѓаните кои ни ја дале довербата, но и како Влада, да разговараме и тука нема никаква тајна и ќе продолжиме да разговараме. Ако некој тие разговори ги смета дека еве сега ние треба да седнеме на маса, па тука официјално да почнеме преговори или разговори, тоа така не функционира, иако и ние би сакале и такви разговори да имаме доколку се создаде можност. Така што ние сме разговарале, разговараме и ќе продолжиме да разговараме. Друго е прашањето дали во тие разговори ќе успееме да постигнеме решение, имајќи предвид која е нашата позиција – рече Мицкоски.

Нашата позиција, додаде, беше комплетно предавнички губитничка врз основа на тоа што го потпишала претходната Влада.

– Е сега од таму почнуваме и се обидуваме педа по педа да повратиме нешто што може да се поврати. Така што ќе продолжиме да разговараме – рече Мицкоски.
 
Во однос на тоа дали има посредник или олеснувач на ваквите разговори, Мицкоски посочи дека разговараат претежно со државници – претседатели на држави и на влади, како и со високи претставници на ЕУ.
 
Додаде и дека има воспоставено директен контакт меѓу кабинетите на Мерц и Макрон со неговиот Кабинет.
 
– И не е тајна дека и кога беше претседателот Кошта, и кога беше комесарката за проширување и добрососедски политики Кос дека тоа го разговараме и дека централна тема на нашите билатерални средби е токму тоа, така што нема тука тајни под или над радарот. Тоа е суштината на оваа Влада, покрај тоа да се грижи да ги реши домашните проблеми и домашните предизвици, да успее да ги реши и меѓународните, односно надворешните предизвици што се многу поголеми, имајќи ја предвид позицијата каде што почнавме, бидејќи 100:0 беше изгубена позицијата којашто ни ја остави претходната Влада – посочи Мицкоски.
 
Прашан дали има промена во интензитетот на разговорите и дали сега се случува поголема активност за доаѓање до некакво решение, премиерот посочи дека во моментов е прилично сложена состојбата во светот и според него не се знае дали апетитот за проширување сè уште ќе биде во оптиката на големите европски лидери.
 
– Ќе дадам мое гледиште. Првиот дел е дека интересот е поголем за проширувањето најмногу поради Украина. И во целиот овој контекст и Балканот како регион е опфатен. Но, се разбира, има многу предизвици во годините што се пред нас, рече Мицкоски во интервјуто.
 

Поврзани содржини

Мицкоски планира да го заврши редовниот мандат ако опозицијата не бара избори
Мацинка: Спорот со Бугарија не е веќе билатерално прашање!
СДСМ: Трајчевски да каже каква е неговата улога за влегувањето на медиумите на Вучиќ во Македонија?
Орхан Муртезани ја презеде функцијата амбасадор во НАТО
СДСМ: Клековски ги празни базените што ги отвори Мицкоски
Чешкиот министер за надворешни работи Петр Мацинка во официјална посета на земјава
ВЛЕН тврди: Блиските на Груби тргнаа против ДУИ
ВМРО-ДПМНЕ за бомбата во Бардовци: Не е фрлена во домот на полицаецот, туку кај татко му

Најчитани