Мицкоски не гледа проблем во прекумерната градба, туку само во прекумерната прашина

Премиерот Христијан Мицкоски денес учествуваше на Надзорната расправа на Koмисијата за здравство околу аерозагадувањето  при што изрази жалење што со децении не е направено ништо за овој проблем и само  се користела гола реторика која, според него, мора да престане и да почнат да се прават работите како што треба.

„И ќе повторам, не е само воздухот, зборуваме за почиста, позелена и поздрава животна средина. Тоа значи, да немаме диви депонии, секое домаќинство да има достапност до питка вода за пиење, да имаме организиран систем за одведување на отпадните води. Така што сето ова е причинител, сето ова се проблеми со кои ние мора да се соочуваме. Само 11% од територијата е покриена со организирање на отпадните води, ќе ви стане јасно за што зборувам“, заклучи Мицкоски.

Одговарајќи на прашање за тоа како владата планира да се справи со инертната и градежната прашина, истакна дека за решавање на овој проблем единствен начин е да се зголеми дисциплината на оние коишто ја создаваат, а од друга страна граѓаните да пријавуваат доколку забележат вакво девијантно однесување со цел градежниот инспекторат да излезе на лице место и да го констатира истото.

„Тука единствен начин е да се зголеми дисциплината на тие коишто ја создаваат таа прашина. Тоа се најчесто компаниите коишто вршат градежни активности и мислам дека дисциплината не е на високо ниво“, истакна Мицкоски.

Премиерот, исто така, ги охрабри граѓаните да пријавуваат доколку забележат девијантно однесување од ваква природа со цел овој проблем да биде надминат.

„Јас ги охрабрувам и граѓаните ако има такви случаи на девијантно однесување да ги пријавуваат и гадежниот инспекторат да излегува на лице место и тоа да го констатира и се разбира, на таков начин да може да се спречи таквата појава. Но, од друга страна со зазеленување на тие површини, така што ова се двата начини со коишто можеме ние да се бориме. Не постои трет начин, а ниту во праксата е познат трет начин. Така што се надевам дека многу скоро оваа дисциплина ќе биде подобрена“, заклучи Мицкоски.

 Според него, оваа тема секоја зима е актуелна, посочувајќи дека не е само воздухот проблем за квалитетот на животот на граѓаните, туку и околината и животната средина.

„Можам да се согласам со најголемиот дел од тезите кои што ги кажавте и со тоа дека изминатите децении многу малку или речиси ништо не е направено во делот на борбата за почист воздух. Но, исто така и во делот на средување на животната средина во која што живеат граѓаните, тука пред се мислам на организирано одлагање на отпад. Но, не само тоа, тука мислам на прочистување на отпадните води, тука мислам на обезбедување на питка вода за пиење за населението, организирани системи за одведување на отпадни води и кога целосно би се организирала државата тогаш можеме да заклучиме дека станува збор за навистина акутен проблем кој што е децении стар и преку ноќ не може да се реши.“

Премиерот Мицкоски посочи дека како влада преземаат драстични мерки за почиста животна средина.

„Како влада преземаме драстични мерки во таа насока, посебно тука би сакал да го споменам проектот кој се однесува на финансирање и реалокација на средства од централниот буџет кон општините за финансирање на проекти кои што би значеле токму ваков начин на обезбедување на поздрава животна средина, меѓу кои и обезбедување на вода за пиење преку водоснабдителни системи, посебно од руралните населени места. Ретко каде имаме обезбедена вода за пиење, а речиси и никаде немаме организиран систем за одведување на отпадните води,  да не зборам за нивен третман“, вели тој и додаде:

„Така што тоа претставува исто така акутен проблем кога станува збор за обезбедување на поквалитетна животна средина. Исто така и организирани системи за одлагање на смет, тие се многу важни и многу значајни, бидејќи во државата би рекол имаме стотици или илјадници диви депонии кои за жал на несовесен начин се одлага сметот, наместо да имаме еден организиран или неколку организирани системи кои што ќе ги користиме за да го одлагаме тој смет.“

Во однос на загадениот воздух Мицкоски истакна дека најголем причинител за таквата состојба е системот на затоплување на домаќинствата, јавните и индустриски објекти.

„Кога станува збор за воздухот и квалитетот на воздухот, најголем причинител е јас би се согласил со вас, е токму тоа што вие го кажавте, системот на затоплување на домови. Но, и на индустриски објекти, јавни објекти. Имаме многу јавни објекти кои што се уште користат фосилни горива за затоплување на самите тие објекти“, истакна Мицкоски.

За решавање на овој проблем премиерот Мицкоски смета дека е потребно да се изградат таканаречени когенеративни гасни централи кои што можат да служат и за производство на електрична енергија и за производство на топлина.

„Кога сето ова би се сумирало, можам да кажам дека ова е еден од главните приоритети и ќе продолжиме во таа насока да се бориме, посебно во делот на обезбедување на централизиран систем за затоплување на домовите, јавните објекти и дел од индустриските капацитети. И како тоа ќе го правиме најчесто тоа може да се реши со изведба на таканаречени когенеративни гасни централи кои што можат да служат и за производство на електрична енергија и за производство на топлина. Но, за сето тоа да се случи потребна е и подземна инсталација за да може таа топла вода да дојде до домаќинствата, до јавните објекти и до индустриските објекти“, рече Мицкоски.