Мицкоски ги зголемува условите, немало никакво приближување
По неуспешната средба кај претседателот Стево Пендаровски и обидот да се договори датум за избори, од партиите протекоа информации за разговорите, кои не се разликуваат многу од тоа што го слушавме јавно деновиве.
Од СДСМ информираа дека лидерот на ВМРО-ДПМНЕ, Христијан Мицкоски, не бил фокусиран на здравствената ситуација, туку ги спорел техничките моменти околу изборите, во смисла колку може да се обезбеди тие да бидат фер и регуларни. Целта на Мицкоски на средбата, како што се информира, била да предизвика што поголема збрка од правни прашања за кои законите и процедурите се јасни.
„Најпрво го отвори прашањето дали мисијата на ОБСЕ/ОДИХР може да дојде од утре, што е нелогично. Мисијата треба да добие точен датум, да се организира и да пристигне. Мисијата веќе најави дека ќе прати набљудувачи“, велат од СДСМ.
Мицкоски спорел исто така дека ДИК има доволно време за да ги спроведе изборите иако законот и Уставот се јасни, дека процесот продолжува во следните 22 дена од моментот на завршување на вонредната состојба. Мицкоски барал и процесот со избирачкиот список да се врати од почеток, со увид, за да се развлече дополнително рокот.
Од опозициската партија, пак, информираат дека точно е дека партискиот лидер истакнал дека за кредибилен изборен процес потребен е увид во избирачкиот список и кредибилна мисија на ОБСЕ/ОДИХР, но побарал гаранции за заштита на здравјето на граѓаните.
„Ние се залагаме за компромис кој е добар за државата и не прифаќање диктати од Заев кои би генерирале дополнителни кризи“, велат од ВМРО-ДПМНЕ.
Утрово пак од партијата повторно продолжија со обвинувања на сметка на претседателот на државата кој според нив решил да му служи на Зоран Заев. Според нив Заев сака избори без набљудувачи, а и Пендаровски потврдил дека ОДИХР не може да испрати целосна мисија. Според нив, Заев турка избори без прочистен список. Имено, како што се тврди, Заев рекол дека ќе се оди на избори со постојниот избирачки список, на што Мицкоски одговорил дека има долг период каде не се евидентирани промените на починати лица и лица кои навршиле полнолетство и дека без прочистен список илузорно е да се зборува дека државата е подготвена за изборен процес.
Заев на аргументите дека заразата со корона вирусот е излезена од контрола, според извори од опозицијата, целосно кренал раце кажувајќи дека тоа е реалноста и нема што повеќе да прави државата. Мицкоски повторно изнел став дека е несериозно да се наддаваат со датуми кои се формата, а суштината на решението е колку државата е способна да го заштити здравјето во овие околности на корона зараза и да обезбеди транспарентен изборен процес.