„Мета“ отпушти значителен број вработени

„Мета“ отпушти значителен број вработени од своите тимови за борба против дезинформации, тролови и вознемирување на своите платформи.

Овој потег предизвикува загриженост за изборите во Соединетите Американски Држави (САД) следната година, пренесува „Си-Ен-Ен“ (CNN), повикувајќи се на анонимни извори кои се добро запознаени со ситуацијата, пренесува Независне новине.

Неколку членови на тимот за дезинформации на „Мета“ за време на минатогодишните среднорочни избори во САД беа отпуштени минатата есен и пролет, рече изворот.

Портпаролот на „Мета“ не прецизираше колку луѓе се отпуштени од тимовите кои работат на изборите, туку само рече дека „заштитата на изборите во САД е еден од приоритетите на компанијата“.

Новата платформа на „Мета“, Тредс (Threads) доби 100 милиони корисници за пет дена, вклучувајќи познати и влијателни, но и контроверзни личности.

Гардијан пишува дека за само 24 часа, американските екстремни десничари Ричард Спенсер и Ник Фуентес, кои веруваат во превласта на белата раса, се приклучија на Threads. „Си-Ен-Ен“ предупредува дека тимот на „Мета“ за лажни вести и дезинформации ќе биде недоволно екипиран со предизвиците што претстојат.

Во наредната година ќе се одржат значајни избори во САД, Тајван, Украина, Индија и други земји.