Мета добитник на меѓународната награда „Златен лав“


Албанија– На албанскиот претседател Илир Мета, на свеченост организирана во Венеција, му беше врачена наградата „Златен лав“.

Наградата му се доделува за придонес во промоција на демократијата и политичкиот плурализам, зајакнување на мирот и стабилноста на Балканот, промовирање на соживотот и верската хармонија, како и за зајакнување на италијанско-албанските односи.

Во присуство на локалните власти на Венецијанскиот регион, кој ја доделува оваа награда, претседателот Мета истакна дека наградата е симбол на пријателство меѓу Италија и Албанија, што е уникатно и неразделно пријателство.

-Ова е награда која првенствено е посветена на албанскиот народ, особено Албанците во Италија, од оние кои пристигнале пред неколку векови во Италија до денешните Албанци, за работниците, студентите и за сите семејства на Албанците. Ова е награда и за илјадниците Италијанци кои живеат и работат во Албанија долги години: претприемачи, студенти, професионалци. Оваа награда е симбол на пријателство меѓу Италија и Албанија, уникатно и неразделно пријателство, изјави Мета.

Тој посочи дека наградата му припаѓа и на неговото семејство, за подршката и љубовта „овозможувајќи ми да работам секој ден со упорност и спокојство“.

-Оваа награда е посветена и на умерените лидери во регионот кои благодарение на зрелоста и дијалогот направија балканските земји, кои носеа само кризи и војни, денеска да бидат се поблиску до Европа и до мирот меѓу народите, рече меѓу другото Мета.

Наградата е воспоставена пред 71 година.

Инаку, Мета е добитник и на признанието „Светски политички лидер за 2018“ што ја доделува фондацијатa „Фуедус“ за „промоција и зацврстување на односите и пројателството меѓу Албанија и Италија“.