„Мерцедес“ ги сели работните места во Унгарија

Мерцедес сака да ги пресели работните места надвор од Германија, а фокусот на компанијата е на Унгарија, особено на локацијата Кечкемет, град со околу 100.000 жители, пишува Дојче веле.

Планот е производството од околу 100.000 автомобили годишно, кои досега се произведуваа во Германија, да се пресели таму. Ова исто така значи дека работните места во Германија ќе бидат изгубени на долг рок. Причината за преселбата на исток, од перспектива на менаџментот на компанијата, се пониските производствени трошоци во Унгарија. Според финансискиот директор на Мерцедес, Харалд Вилхелм, трошоците за работна сила во Унгарија се за околу 70 отсто помали отколку во Германија, објавија германските медиуми. Унгарскиот премиер Виктор Орбан објави фотографии со извршниот директор на Мерцедес Оле Калениус во средината на март.

„Фабриката Кечкемет стана втората по големина европска фабрика за автомобили на Групацијата Мерцедес-Бенц, вработувајќи речиси 5.000 луѓе во Унгарија. Благодарение на проширувањето на Кечкемет, кое моментално е во тек, компанијата ќе отвори 3.000 нови работни места до 2026 година и ќе го удвои својот производствен капацитет на 400.000 возила годишно, стои на веб-страницата.

Мерцедес не ја потврди средбата меѓу Келениус и Орбан на 17 март во Будимпешта, ниту средбата на Орбан со извршниот директор на Мерцедес на 19 јуни 2024 година во Штутгарт. Европската унија и задржа милијарди евра на Унгарија поради кршење на владеењето на правото и слободата на медиумите, додека инвестициите од концерните како Мерцедес и носат свежи пари на Унгарија и ја зајакнуваат позицијата на Орбан, пишува германскиот весник. Менаџментот на Мерцедес соопшти дека се раководел од политичките насоки и се придржувал до законската рамка. Во меѓувреме, и BMW и Bosch ги прошируваат своите активности во Унгарија, на штета на нивните погони во Германија, пишува Дојче веле.