„Мегле“ го затвора производството во Хрватска, се сели во БиХ и во Србија?

„Мегле Хрватска“ во четвртокот објави дека ги реструктуира своите операции во Хрватска и дека ќе го затвори производството во Осиек до крајот на годинава, со што без работа ќе останат околу 160 вработени

Како што пренесуваат хрватските медиуми, германската група „Мегле“ е во процес на оптимизирање на целокупниот бизнис со цел поставување долгорочни одржливи деловни модели на сите пазари. Според тоа, донесена е одлука да се реструктуираат операциите во Хрватска и да се затвори производството во Осиек до крајот на годината, се вели во соопштението на млечната компанија.

Веста за затворање на „Мегле“ во Осиек и отпуштањето на 160 работници, ја крена јавноста и политичката сцена во Славонија. Како што пренесува СЕЕбиз, префектот Иван Анушиќ вели дека во изјавата од компанијата изостанала една важна информација.

„Тие не рекоа дека производството се сели во Бихаќ и во Крагуевац, односно во БиХ и Србија. Причините се многу едноставни: поевтин начин за водење бизнис и можеби поедноставен начин за функционирање. Во моментов, јас ги немам тие информации, но претпоставувам, со оглед дека производството се движи во тие две земји, тоа е тоа“, изјави Анушиќ, додавајќи дека постои начин да се изврши притисок, и тој сигурно ќе го стори тоа.

„Нема да дозволиме ова да исчезне преку ноќ затоа што видовме премногу со текот на годините. Во тек се преговори со други компании како да се спасат работните места и преработката на млеко во Осиек“, истакна префектот.

Инаку, во соопштението на компанијата се вели дека одлуката за реструктуирање на работењето во Хрватска и затворање на производството во Осиек е донесена поради долгогодишните деловни предизвици и низата кризи кои имаа негативно влијание врз работењето, од афлатоксинската криза до кризата „Агрокор“ до најновата криза со корона.

„Одлуката за затворање на производството е одложена неколку пати во последните неколку години со надеж дека деловните услови и околностите ќе се подобрат и конечно беше донесена откако дефинитивно беа истражени сите други опции“, се вели во соопштението.

„Мегле“ ќе ја прекине и соработката со кооперантите и добавувачите на суровини, но наведува дека компанијата ќе ги исполни сите свои договорни обврски навремено и во целост.

„На хрватскиот пазар побарувачката за сурово млеко е хронично поголема од понудата, а ‘Мегле’ ќе им помогне на своите добавувачи, вклучително и 200 мали рурални домаќинства, брзо да најдат нови купувачи“, се вели во соопштението.

Компанијата потсетува дека „Мегле груп“ има инвестирано повеќе од 130 милиони куни во производство и бизнис во Хрватска во последните 15 години. Патем, „Мегле работи во Хрватска од 1996 година кога влезе во хрватскиот пазар преку дистрибутивен центар. Три години подоцна, компанијата започна со производство, во соработка со млекарницата Осиек, ИПК Миа, од која е креирана „Мегле Миа“. Во септември 2004 година, „Мегле Миа“ се спои со млекарницата ИПК Миа и тие го продолжија својот бизнис како една компанија со ново име „Мегле Осиек“, а на крајот на 2005 година фабриката за производство во Осиек се спои со „Мегле Адриа“, која ја основаше денешната компанија „Мегле Хрватска“, со седиште во Осиек, пишува Вечерњи лист.

Според веб-страницата на компанијата, „Мегле Хрватска“ во моментов е трета млекарница во Хрватска, вработувајќи околу 185 работници. (Н.В.)