МБА предупредува за сомнителни СМС пораки за корисниците на платежни картички
Македонската банкарска асоцијација се приклучи на апелите за внимание околу актуелната кампања за smishing (SMS phishing) за корисниците на платежни картички.
„Согласно искуството кое клиентите го пријавуваат, до нив стигнува СМС порака на македонски јазик од SMSinfo во врска со „погрешна адреса“ на пратка заедно со линк кој води до лажна веб страница наменета за нелегално преземање на податоци за картички и други лични податоци“, велат од МБА.
Од таму појаснуваат дека при користење на платежните картички на интернет постојат неколку задолжителни проверки кои мора да бидат направени:
- Веб страницата треба да биде безбедна (да има иконка катанец пред името)
- Проверка на називот на веб страницата (посебно делот после точката дали е логичен или намерно направен да ве измами)
- Користете сигурна интернет конекција (по можност приватна)
„Доколку се сомневате во веродостојноста на понудата не внесувајте детали од картичката (на пр. телефонски уред за 1 денар, сместување за неверојатно ниски цени, бесплатен авионски билет и сл.)“, велат од МБА.
Од МБА исто така нагласуваат редовно да се проверува состојбата на платежните сметки поврзани со картичките и да се постават лимити за користење на картичките преку интернет.
„Сите можни злоупотреби веднаш пријавете ги во Вашата банка и во надлежните институции“, посочуваат од МБА.