Маурисио Покетино доаѓа во „Пари Сен Жермен“

Аргентинскиот фудбалски стручњак, 48-годишниот Маурисио Покетино, постигна договор со раководството на „Пари Сен Жермен“ и ќе го замени Германецот Томас Тухел на клупата на францускиот шампион, објави парискиот спортски весник „Л’Екип“.

Покетино е надвор од терените од ноември 2019 година, кога беше отпуштен во Тотенхем поради низата слаби резултати, откако само пет месеци порано го одведе тимот во финалето на Лигата на шампионите.

Во текот на својата играчка кариера, Покетино помина три сезони во дресот на ПСЖ и постигна шест гола на 95 натпревари за францускиот тим, кој го освои згаснатиот УЕФА Интертото куп (2001) и беше финалист во Купот на Франција (2003).

ПСЖ во четвртокот изненадувачки го отпушти Германецот Томас Тухел, кој го водеше тимот до убедлива (4-0) првенствена победа над Стразбур во средата вечерта, со која третопласираниот ПСЖ стигна на само еден бод од водечкиот Лион и второпласираниот Лил.

Под водство на Тухел, ПСЖ ја освои титулата во Франција во две сезони, а минатата сезона ја освои домашната тројна круна и се пласираше во финалето на Лигата на шампионите на последниот турнир во Лисабон, каде што беше поразен од Баерн во изедначенот финале со минимални 0-1.

ПСЖ исто така оваа сезона избори пласман во осминафиналето во елитното европско клупско натпреварување, а за пласман во четвртфиналето, ждрепката на Французите им ја додели Барселона.