Маск сака пристап до американскиот систем на даночни обврзници

Одделот за ефикасност (DOGE) предводен од Илон Маск бара пристап до високо чувствителен систем на Внатрешна служба за приходи што содржи податоци за даночните обврзници, изјави извор за Си-Ен-Ен.

Американската даночна служба (IRS), која поседува приватни даночни пријави на милиони Американци, броеви за социјално осигурување и банкарски информации, е најновата агенција под лупа на DOGE, која се обидува значително да ја намали федералната работна сила и да го искорени она што го карактеризира како „отпад, измама и злоупотреба во владата“.

Гевин Клигер, софтверски инженер кој работи под DOGE, се очекува да добие пристап до системот „наскоро“, изјави извор за Си-Ен-Ен. Во Даночната управа треба да помине најмалку 120 дена.

„Отпадот, измамата и злоупотребата се длабоко вкоренети во нашиот расипан систем предолго. Потребен е директен пристап до системот за да се идентификува и поправи“, изјави за Си-Ен-Ен заменик-портпаролот на Белата куќа, Харисон Филдс.

„DOGE ќе продолжи да ги осветлува измамите што ги открива бидејќи американскиот народ заслужува да знае на што нивната влада ги потрошила своите тешко заработени даночни долари“, додаде тој.

Клигер ќе служи како виш советник на вршителот на должноста комесар на Службата за внатрешни приходи, иако сè уште не е јасно каква ќе биде точната природа на неговата работа во агенцијата.

Клигер има соодветно безбедносно одобрение и се очекува да потпише договор со кој ќе се бара од него да ја одржува доверливоста на информациите и да ги уништи сите доверливи материјали по напуштањето на Даноќната управа, додаде изворот.

Системот содржи некои од најчувствителните финансиски податоци на даночните обврзници.

Договорот е дел од поширокиот меморандум кој моментално се разгледува од страна на Даночната управа, со кој на службениците на DOGE ќе им се овозможи широк пристап до системот на агенцијата, вклучувајќи го и Интегрираниот систем за пребарување на податоци (IDRS), кој им овозможува на вработените во управата да пристапат до одредени сметки на даночни обврзници и нивните банкарски информации.

IDRS содржи некои од најчувствителните финансиски податоци за американските даночни обврзници. Според Даночната управа, системот е дизајниран да спречи податоците од даночните обврзници да паднат во погрешни раце. Овластените вработени можат да пристапат до чувствителните податоци на даночните обврзници само за извршување на одредена и службена задача.

„Даночниот обврзник мора да биде заштитен од неовластено откривање на информациите за неговата/нејзината сметка и неовластени промени на нив“, се наведува во прирачникот за вработени на Службата за внатрешни приходи.

Податоците до кои IDRS им дозволува пристап на овластените вработени вклучуваат броеви за социјално осигурување, информации за банкарска сметка, адреси, даночни пријави и други лични информации. Вклучува и приватни податоци за даночните обврзници. На пример, IDRS вклучува информации за посвојувањата на даночните обврзници, така што родителите можат да бараат ослободувања и кредити за грижа за деца.

Протоколите се доста строги и ги спречуваат вработените во даночната управа да пристапат до нивните сопствени досиеја или досиеја што им припаѓаат на нивните сопружници, пријатели, роднини, соработници или било кој со кого имаат личен или деловен однос.

Казната за злоупотреба е отказ, парична казна и евентуална затворска казна до една година.