Марија Колесникова го искинала пасошот на границата со Украина за да го спречи депортирањето

Марија Колесникова  изјавуваше дека нема да ја напушти Белорусија и покрај заканите на властите (Фото: АФП)

Еден од главните лидери на опозицијата во Белорусија со кинењето на пасошот го избегнала присилното протерување од нејзината земја

 

Белоруската опозициска фигура Марија Колесникова го искинала пасошот за да избегне депортација од сопствената земја, пренесуваат украинските медиуми.

Во понеделникот маскирани лица ја киднапираа Колесникова од центарот на Минск и ја однесоа со комбе. И двајцата нејзини колеги од опозицијата исчезнаа. Тројцата активисти подоцна беа возени на граничниот премин Александровка со Украина со автомобил кој пристигна во вторникот околу 4 часот наутро.

Според извештаите, Колесникова одбила да премине и намерно и го искинала пасошот. „Кога се обидоа да ја депортират, таа го искина својот пасош и не можеше да ѝ биде дозволен влез на територијата на Украина од страна на граничарите“, изјави извор за агенцијата Интерфакс-Украина.

Заменик-министерот за внатрешни работи на Украина, Антон Герашченко, објави на Фејсбук дека Колесникова успешно спречила „присилно протерување од нејзината родна земја“.

Се верува дека активистите со неа – Антон Роденков и Иван Кравцов – сега се во Украина. Официјалната новинска агенција на Белорусија, Белта, соопшти дека Колесникова била исфрлена од автомобилот, кој продолжил без неа преку украинската граница. Белоруските граничари тогаш се чини дека повторно ја грабнале Колсеникова. Официјалните лица не потврдија што се случило, а настаните на границата и нејзината локација не се разјаснети.

„Колесникова сега е приведена. Не можам конкретно да кажам каде е, но таа е приведена “, изјави за Ројтерс Антон Бичоковски, портпарол на граничната стража на Белорусија. „Таа беше приведена во согласност со која тие [групата] ја напуштија Белорусија“.

Колесникова беше партнер во предизборната кампања на опозицискиот кандидат Светлана Тихановска, која извојува победа против долгогодишниот претседател Александар Лукашенко, на спорните избори на 9 август.

Таа беше грабната во понеделникот заедно со уште најмалку тројца членови на координативниот совет, кој беше формиран да бара мирен трансфер на власта во услови на широко распространето отфрлање на официјалните изборни резултати, кои му дадоа 80 отсто од гласовите на Лукашенко.

Германија и Велика Британија побараа одговори за тоа каде се наоѓа Колесникова. Британскиот министер за надворешни работи, Доминик Раб, објави на Твитер: „Сериозно загриженост за состојбата на Марија Колесникова во Белорусија. Режимот на Лукашенко мора да ја направи нејзиното безбедно враќање најголем приоритет. Режимот мора да престане со брутализирање на демонстрантите, да ги ослободи политичките затвореници и да започне дијалог со опозицијата“.

Изразувајќи загриженост за судбината на Колесникова, германскиот министер за надворешни работи, Хајко Мас, побара „јасност за локацијата и ослободување на сите политички затвореници во Белорусија“.

Европската унија бара итно ослободување на сите притворени по протестниот марш во неделата (Фото: Тасс)

 

Европската унија е на чело на повиците Белорусија веднаш да ослободи над 600 лица уапсени за време на протестите против режимот. Министерството за внатрешни работи соопшти дека 633 лица биле приведени во неделата за нелегално масовно собирање, едно од најголемите бранови апсења од раните денови на демонстрациите.

„ЕУ очекува белоруските власти да обезбедат итно ослободување на сите приведени под политичка основа пред и по фалсификуваните претседателски избори на 9 август“, рече нејзиниот шеф на дипломатијата Жозеп Борел. „ЕУ ќе воведе санкции за лица одговорни за насилство, репресија и фалсификување на изборните резултати“.

Министерот за надворешни работи на Канада, Франсоа-Филип Шампањ, повика на ослободување на притворените лица, вклучително и членови на опозицијата и новинари. „Најновите произволни апсења на главните опозициски гласови и акти на репресија се неприфатливи“, рече тој.

Во неделата, повеќе од 100.000 луѓе маршираа кон резиденцијата на претседателот повикувајќи го да поднесе оставка. Банди провладини насилници ги тепаа демонстрантите на пат кон дома.

Маскираните мажи кои ја грабнаа Колесникова во понеделникот, ја однесоа со комбе без таблички, што се чинеше дека е дел од насочениот обид на властите да го избришат протестното движење. Не беше јасно кој ја киднапирал Колесникова.

Нејзиниот колега Родненков, наводно, исчезнал околу 40 минути откако потврдил дека Колесникова исчезнала. Руската новинска агенција Интерфакс ја цитираше полицијата во Минск дека тие не ја привеле. (АФП)