Македонија на 55. место од 167 земји на Индексот на просперитет на Легатум

Македонија е рангирана на 55. место од 167 земји на Индексот на просперитет на Легатум, годишно рангирање развиено од Институтот Легатум, независна образовна добротворна организација основана и делумно финансирана од приватната инвестициска фирма Легатум. Рангирањето се заснова на различни фактори, вклучувајќи богатство, економски раст, образование, здравје, лична благосостојба и квалитет на живот.

Македонија има најсилни резултати во инвестициската средина и условите за живеење, но е најслаба во природната средина. Најголемо подобрување во однос на пред една деценија има во социјалниот капитал, се вели во извештајот. Од 2011 година, Македонија се искачи на ранг-табелата за 3 места.

МИА пренесе дека во 2022 година просечен расположлив приход по жител мерен според стандардот за куповна моќ (ППС) во Северна Македонија изнесувал 5.988, што претставува зголемување за 41 отсто во споредба со 2017 година, според податоците на Индексот на просперитет на Легатум. 

Според овие податоци, дури две третини од најпросперитетните земји во светот се наоѓаат во Европа, но и меѓу нив постои значителна разлика во приходите мерени според стандардот за куповна моќ (ППС) по домаќинство, при што жителите на западните и нордиските држави имаат значително повеќе расположливи средства за трошење од оние на југот и истокот на континентот. 

Европската статистичка агенција – Евростат како расположлив приход на домаќинствата ги смета средствата што едно домаќинство ги има на располагање за трошење и заштеда по оданочувањето и по плаќањето на режиските трошоци.  

На листата на европски земји во која се вклучени членките на ЕУ и на Европската зона за слободна трговија (ЕФТА), како и кандидатите за членство во Унијата, со приходот од 5.988 ППС по жител Северна Македонија е на претпоследното место, пред Албанија која има 4.385 ППС. Пред земјава се Турција со 6.210 ППС, Црна Гора со 6.328 и Србија со 6.968 ППС по жител.  

Следна на листата, пред Србија, е Бугарија со 9.671 ППС и е држава со најнизок просечниот приход по глава на жител меѓу членките на ЕУ, а пред неа се Словачка со 9.826, Романија со 10.033, Унгарија со 10.217 и Грција со 10.814 ППС по жител. 

На првото место на листата е Луксембург со просечниот расположлив приход по жител од 33.214 ППС, пред Норвешка со 27.090, Швајцарија со 26.389, Холандија со 25.437, Австрија со 25.119 и Белгија со 24.142 ППС по жител. 

Меѓу четирите најголеми земји во ЕУ, Германија е деветта со 23.197 ППС по жител, Франција 12-та со 20.575, Италија е 17-та со 18.472 и Шпанија 18-та со 17.254 ППС по жител. Просекот во ЕУ изнесува 18.706 ППС по жител. 

Хрватска, која е последната земја што се приклучи на ЕУ, со 12.277 има повисок просечен расположлив приход од шест членки на Унијата. 

Споредено со 2017 година, најголем раст на просечниот расположлив приход по жител бележи Романија од 101 отсто, а потоа следуваат Србија со раст од 68 и Литванија од 66 проценти. 

Единствена земја на листата што бележи пад на расположлив приход во периодот 2017 – 2022 година е Турција, каде тој се намалил за 27 отсто.