Македонија ѝ врачи протестна нота на Бугарија (ВИДЕО)

Министерството за надворешни работи на  Македонија до Министерството за надворешни работи на Бугарија упати протестна нота во врска со видеото на пратеникот во Европскиот парламент од Бугарија и заменик-претседател на политичката партија ВМРО – Бугарско национално движење, Ангел Џамбаски.

„Ќе ги известиме и соодветно ќе реагираме и до институциите во Европската унија. Во оваа прилика напоменуваме дека ваквите изјави не придонесуваат во напорите за продлабочување на пријателството, добрососедството и соработката меѓу двете земји. Реторика во која се изразуваат територијални претензии кон соседите не доликува на земји-сојузнички во НАТО и земја-членка на Европската унија, што е директно и спротивна на идеалите и вредностите на Европската унија, на кои и двете земји силно се посветени“, стои во реакцијата на македонското МНР.

Џамбаски во скандалозното видео што се граничи со фашизам  ги промовира големобугарските соништа поткрепени од Санстефанскиот догово, порачувајќи дека дека Македонија е бугарска, а Бугарија е над се. Вели дека ние сме само „привремени управители“ во Македонија. Според него, не може да се живее во 21 век, без да се признае 20-от век.