Лоша е состојбата со хидрантските мрежи во колективните згради во Битола

БИТОЛА – Трагедијата во Кочани од 16 март отвори многу прашања околу безбедноста на граѓаните од пожари и поплави особено во колективните згради. По апелот на битолчани во каква состојба е хидрантската мрежа во колективните згради и дали има ПП апарати и дали функционираат противпожарните скали, се разоткрија низа пропусти и аномалии.

Известувањето со констатираната состојба, испратено е и до Државниот комунален инспекторат, како надлежен за постапување и утврдување на состојбата на терен.

Општина Битола испрати инспекциски контроли минатата недела, а податоците од терен се лоши. Без хидрантска мрежа се вкупно 243 колективни згради во Битола и истите не поседуваат ниту ПП апарати.

Општинскиот инспекторат утврдил низа на пропусти во исполнетоста на обврските согласно Законот за домување – дали зградата има хидрантска мрежа, дали хидрантите имаат црева за вода, колку од зградите поседуваат ПП апарати и дали има лица кои што знаат со нив да ракуваат.

„На територијата на општина Битола, од вкупно 640 згради (секој влез се утврдува како посебна зграда), 590 се под управување на станбените сервиси, а за останатите во тек е утврдувањето на нивната состојба. Податоците од станбените сервиси, говорат дека од 590 згради: Згради со хидрантска мрежа се вкупно 347, од кои 22 поседуваат и ПП апарати. Згради без хидрантска мрежа се вкупно 243 и истите не поседуваат ниту ПП апарати, соопштија од Општина Битола.

Фрапантен е и податокот дека само четири згради од 590 имаат план за евакуација.

Инспекторот веќе доставил известувања до сите станбени сервиси во најкус можен рок да ги отстранат сите неправилности во зградите кои се под нивно управување. Од Општина Битола велат дека тоа „вклучува: одржување, поправка и замена на хидранти, хидрантски црева и други хидрантски делови, набавка на нови противпожарни апарати и редовно сервисирање на постоечките, обезбедување на функционалност на противпожарните скали во зградата, одржување, поправка и сервис на лифтови, лифтовски простории и уреди, како и технички преглед на истите, поправка на оштетените и замена на дотраените фасади, фасадни облоги и елементи на фасади.“

Контролите спроведени во училиштата и детските градинки, покажуваат дека овие институции функционираат како безбедни средини, велат од општината. Истите се опремени со противпожарни апарати, како и обучени вработени, додека хидрантски мрежи, има секаде каде што може истите да се инсталираат. За исправноста на ПП апаратите или хидрантската мрежа надлежни се лиценцирани фирми кои ги одржуваат, а секаде каде што ќе се појави потреба од дополнување на опремата, истото ќе биде направено по изготвувањето на финалните извештаи во координација со сите надлежни институции, најдоцна до средината на април.

По ова битолчани бараат и проверка колку се легални и што е најважно стабилни сите доградби над колективните згради, особено постарите градби од пред четириесет до педесет години. За граѓаните е важно да се даде одговор како поминале технички прием доградувањата на нови станови, со какви материјали се гради и колку се безбедни во случај на земјотрес.