Лидерот на левицата во Италија, Енрико Лета, најави оставка по поразот на изборите

Лидерот на главната италијанска опозициска партија, Енрико Лета, во понеделникот објави дека ќе се повлече по поразот на општите избори во неделата.

Обраќајќи им се на своите приврзаници од седиштето на Демократската партија, Лета рече дека засега ќе остане, но дека нема да се натпреварува на следниот партиски конгрес. Не е јасно кога ќе се одржи конгресот.

Лета, кој беше премиер во 2013-2014 година, рече дека тоа е „тажен ден за Италија и Европа“.

„Италијанските мажи и жени избраа, јасен избор, земјата ќе има десничарска влада“, додаде тој.

Партијата на левиот центар се најде на второто место на изборите со 19 отсто од гласовите. Коалицијата на десничарските партии предводена од партијата Браќа од Италија на Џорџа Мелони победи со 44 отсто.

Мелони треба да ја предводи најдесничарската влада во Италија од Втората светска војна.