Левица го повика Таравари да почне да работи
Левица тврди дека и со оваа влада продолжува уништувањето на Клиниката за онкологија и дека приоритет е луксузирањето место потребите на граѓаните.
„По скандалите со кражбата на лекови од Клиниката за онкологија, кои завршуваа на црниот пазар, новата администрација го достигнува врвот на неспособноста – веќе неколку недели пациентите немаат пристап до животоспасувачки цитостатици! Јавното здравство веќе одамна не е приоритет за властите – тоа е само алатка за политички пазарења и профитирање на криминални структури. Кражбата на лекови од Клиниката за онкологија која одекна во јавноста, заедно со организираниот систем за нивно продавање на црниот пазар, беше најголемиот доказ за расипаноста на политичките елити. ВРЕДИ и ДПМНЕ не само што не ставија крај на овој хаос, туку сега е јасно дека тие се продолжувачи на коруптивните практики од времето на СДС“, тврдат од Левица.
Според нивна оценка, Македонија не е сиромашна земја, туку ја водат корумпирани и алчни политичари.
„Доказ за тоа е неодамнешната иницијатива за купување нов владин авион – луксузен трошок кој доаѓа во момент кога пациентите со канцер умираат поради недостиг на лекови и чекајќи термини за преглед. Министерот Таравари, кој помпезно најавуваше реформи во јавното здравство со кои би се надминале овие проблеми – од почетокот на владеењето до денес нема преземено никакви суштински активности како министер. Неговата позиција во Владата не служи за подобрување на здравствениот систем, туку за задоволување на великоалбанските апетити и унапредување на противуставната двојазичност. Во меѓувреме, здравствените установи во државата тонат во хаос, бележат секојдневни скандали и алармантен број на смртност, особено на деца. Левица апелира на будно следење од институциите на криминалните активности на Клиниката за онкологија. Воедно, му порачуваме на Таравари да се врати од неговите непродуктивни екскурзии и конечно да засука ракави”, порачуваат од Левица.