Лажните тврдења станаа „бренд“ на Трамп

Доналд Трамп беше претседател на САД помалку од 15 минути кога го изнесе своето прво фактички сомнително тврдење.

„Злобното, насилно и неправедно користење на Министерството за правда како оружје од нашата влада ќе заврши“, рече тој на почетокот на своето инаугуративно обраќање. Нема докази дека поранешниот претседател Џо Бајден му наредил на Министерството за правда да го гони Трамп и дека немало насилство.

Враќањето на Трамп во Белата куќа за неговиот втор претседателски мандат е исто така враќање на она што еден критичар го нарече „главен лажго на Америка“. Неговата прва недела на функцијата донесе каскада од лажни и погрешни тврдења за имиграцијата, економијата, електричните возила, Панамскиот канал, неговиот изборен пораз во 2020 година и бунтот на 6 јануари што следеше.Некои сметаат дека дрското прифаќање на лажноста е и вообичаено и стратешко.

„Тоа е продолжение на брендот на Доналд Трамп“, рече Тара Сетмаер, поранешен републикански директор за комуникации на Капитол Хил.

„Тој знае дека сончевата светлина е најдоброто средство за дезинфекција, па затоа ќе продолжи да лаже за да го маскира она што го прави. Ако можете да ги поткопате институциите и веродостојните извори на информации, можете да се извлечете со лажење и мамење луѓе. Гледаме дека масовна заблуда се случува пред нашите очи во администрацијата Трамп 2“.

За време на неговиот прв претседателски мандат, Трамп изнел 30.573 лажни или погрешни тврдења во текот на четири години, според пребројувањето на „Вашингтон пост“. Слично темпо задржа и за време на кампањата за претседателските избори минатата година. Во понеделникот, кога по вторпат положи заклетва во американскиот Капитол во Вашингтон, тој јасно стави до знаење дека ќе биде вообичаено.

Трамп во своето инаугуративно обраќање рече дека американската влада „не ги штити нашите величествени американски граѓани кои го почитуваат законот, но обезбедува засолниште и заштита за опасните криминалци, многумина од затворите и менталните институции кои илегално влегле во нашата земја од целиот свет“. Всушност, нема докази дека другите земји ги испраќаат своите криминалци или ментално болни преку граница.

47-от претседател, исто така, вети дека ќе го насочи својот кабинет да ја победи „рекордната инфлација“ и брзо да ги намали трошоците и цените. Инфлацијата достигна врв од 9,1% под Бајден во јуни 2022 година, но беше многу повисока во други историски периоди, како што е стапката од повеќе од 14% во 1980 година.

Разговарајќи за неговата желба САД да го вратат Панамскиот канал, Трамп рече:

„Американските бродови се сериозно оптоварени  и не се третираат праведно на кој било начин, облик или форма, а тоа ја вклучува и американската морнарица. И, пред сè, Кина управува со Панамскиот канал“. Официјални лица во Панама ги негираа тврдењата на Трамп дека Кина управува со каналот и дека САД натплаќаат.

Набргу по церемонијата на инаугурација, нападот против реалноста продолжи. Во забелешките пред преполната публика во Салата за еманципација на Капитол, Трамп тврдеше: „Патем, 2020 година, тие избори беа целосно наместени“. Властите кои ги разгледаа изборите – вклучително и јавниот обвинител на Трамп – заклучија дека биле фер.

Трамп обвини дека тогашната претседателка на Претставничкиот дом Ненси Пелоси „ја одбила понудата од 10.000 војници“ на 6 јануари 2021 година, кога насилна толпа упаднала во американскиот Капитол. Сепак, тој не издаде таква наредба или формално барање за војниците на Националната гарда пред или за време на немирите.

Претседателот тврди дека Бајден помилувал „ 33 убијци, апсолутни убијци, најлошите убијци. Знаеш, кога ќе добиеш смртна казна во САД, мора да си бил лош“. Бајден минатиот месец објави дека ги ублажува казните на 37 од 40 лица осудени на федерална смртна казна. Комутацијата не е помилување и не го ослободува лицето.

Трамп продолжи со лажни тврдења, претерувања и бесрамни лаги цела недела во серијата обраѓања пред новинарите. Во интервјуто за Фокс њуз во Овалната соба, тој се обиде да го објасни своето целосно помилување за бунтовниците од 6 јануари, отфрлајќи ги насилните напади врз полицијата како „многу мали инциденти“.

Трамп, исто така, го искористи интервјуто за да го повтори лажното тврдење дека гувернерот на Калифорнија, Гевин Њусом и други официјални лица одбиле да обезбедат вода од северниот дел на државата за гаснење на пожарите. Тој лажно тврдеше дека Њусом му дава приоритет на зачувувањето на загрозените риби пред јавната безбедност.

Дури и веб-страницата на Белата куќа е компромитирана. Меѓу тврдењата за официјалната биографија на Трамп е дека тој освоил „убедлива победа“ минатата година и дека „ја дефинира американската успешна приказна“. Но, сајтот ја изоставува големата лага на Трамп дека победил на претседателските избори во 2020 година, наведувајќи дека „победил по втор пат и покрај неколкуте обиди за атентат и невиденото користење на законот како оружје против него“.

Но, додека проверувачите на факти продолжија да го повикуваат Трамп на одговорност, републиканците изгледаа помалку подготвени од кога и да е да го поправат тоа, додека десничарските влијателни лица беа желни да ги засилат неговите невистини во она што сега е фрагментиран медиумски екосистем. На неговата инаугурација присуствуваа лидерите на Amazon, Apple, Facebook, Google и X. Главниот извршен директор на Фејсбук, Марк Цукерберг неодамна објави дека платформата ќе се откаже од проверката на факти од трета страна.

Курт Бардела, демократски стратег и консултант за односи со медиумите, рече: „Ако има некое трајно влијание од времето на Доналд Трамп на политичката сцена, тогаш живееме во свет  каде што можете само да измислувате сопствени факти и како сакате ќе ја прествите вистината  во јавноста.Постојат креатори на содржини и машини за содржина кои постојат исклучиво со цел да „исперат“ се што ќе каже Доналд Трамп и да се обезбеди вистина до одреден степен. Тоа е игра надвор од цитатот на [Ричард] Никсон: Ако претседателот го прави тоа, тоа е легално. Па, ако тоа го каже претседателот, тоа е вистина. Тоа е светот во кој живееме сега“.(Гардијан)