Лавров: За мир во Украина неопходна промена на декретот на Зеленски

Рускиот министер за надворешни работи Сергеј Лавров денеска изјави дека заради мирот во Украина, неопходно е да се промени претседателскиот декрет издаден од Володимир Зеленски минатата година.

-Ќе треба да го поканите господинот Зеленски, бидејќи пред година и пол потпиша декрет со кој се забрануваат преговори со Владимир Путин, рече Лавров на прашањето за дипломатскиот пристап кон прекинот на огнот.

Министерот за надворешни работи на Русија додаде дека верува оти Западот се обидува да ја истроши Русија во Украина, пренесуваат британските медиуми.

-Останува на Украинците да препознаат колку длабоко се во дупката што Америка ја ископа, нагласи Лавров.

Кога го потпиша указот минатата година, Зеленски истакна дека Украина е подготвена за разговори со Москва, но под услов Русија да биде предводена од друг претседател.

Лавров изјави и дека „е неприфатливо Израел да го користи терористичкиот напад на Хамас на 7 октомври како оправдување за колективното казнување на палестинскиот народ и повика на присуство на меѓународни набљудувачи на местото на настаните во Појасот Газа“.