„Кукла жива“: Тамара на 3 септември ќе го промовира првиот визуелен албум во Македонија
Тамара Тодевска е повторно во фокусот на македонската музичка сцена со нејзиниот нов студиски албум „Кукла жива”. Албумот составен од 10 песни и 10 визуелни приказни постепено ја водат публиката кон промоцијата на 3 септември и до концертната промоција на 3 октомври во арената „Борис Трајковски“. На албумот, како што вели поп-ѕвездата, работат некои од најдобрите музичари во Македонија, комплетно сниман со живи инструменти и песни кои се инспирирани од различни периоди на нејзиниот живот.
„10 песни. 10 приказни. Една нова ера. Визуелниот албум ‘Кукла жива’ пристигнува на 3 септември“, објави Тамара на социјалните мрежи.
Пејачката откри дека станува збор за визуелен албум и ги повика обожавателите однапред да го зачуваат изданието за да бидат меѓу првите што ќе го слушнат. Веќе три песни од албумот се веќе објавени: „Кукла жива“, „Дранжма Квин“ и „Дива“.
Музиката и текстот се потпишани од Коста Петров и Тамара Тодевска, а продукцијата е на Емин Џијан.
Поп-пејачката на насловната слика за албумот позира во смело црно издание. Црно-белата фотографија е дел од визуелниот идентитет на новиот проект.
На црно-белата фотографија пејачката е со кратка руса коса, а телото ѝ е прекриено со црна, сјајна креација која остава впечаток на скулптура и ја нагласува нејзината силуета. Со рацете поставени на колковите и сериозниот поглед кон камерата, Тамара изгледа самоуверено и моќно, а целиот визуелен концепт има уметничка и футуристичка нота. Во заднината дискретно е испишано нејзиното име, додека насловот „Кукла жива“ е испишан со црвени ракописни букви.
„Да напишеш книга е едно. Да напишеш албум е нешто сосема друго. А да пишуваш албум за уметник како Тамара е искуство што никогаш нема да го заборавам.
„Кукла жива“ носи десет песни, а со новото издание Тодевска отвора ново поглавје во својата музичка кариера“; напиша на ФБ постот, авторот на текстовите, Коста Петров.
Тамара е присутна на македонската музичка сцена повеќе од две децении. Македонија ја претставуваше двапати на Евровизија, во 2008 година во Белград, заедно со Врчак и Адријан Гаџа, и во 2019 година во Тел Авив со песната „Proud“. Тогаш го постигна најдобриот резултат на Македонија на Евровизија, освојувајќи го седмото место во финалето.