Крводарителска акција на Црвениот крст на град Скопје во чест на солидарноста по скопскиот земјотрес

Црвниот крст на град Скопје денеска спроведува традиционална крводарителска акција во знак на сеќавање на катастрофалниот земјотрес што го погоди Скопје во 1963 година, но, како што истакнаа од таму, исто така и во чест на солидарноста, хуманоста и несебичноста што граѓаните ја покажаа во најтешките моменти.

Александра Валкановска, стручен соработник во Црвниот крст на град Скопје, во изјава за МИА истакна дека особено е важна оваа крводарителска акција затоа што се случува во летниот период.

– Летниот период луѓето се раздвижени, одат на одмори, има некогаш и недостиг на одредени крвни продукти, крвни групи, така што е многу важно овие летни акции да се добро организирани. Има интерес. Очекуваме бројка од приближно150 дарители да имаме на денешната акција, можеби и 200. До 18 часот е отворена акцијата – нагласи таа.

Денешното крводарување се реализира во Домот на АРМ.

– Всушност, ваков тип акции, како оваа, се во делот и промоција на крводарителството, меѓутоа малку и помасовни во делот на задоволување на потребите од крв и крвни продукти. Има акции што се и помасовни во другите градови во Македонија, меѓутоа она што е важно е дека, всушност, крводарителството бара континуитет. Крводарителски акции има речиси секој ден во друга организација во државата, што значи дека и дарувањата, и ако се 30 и 40 и 100, се драгоцени бидејќи нам ни се потребни и доволни количини, меѓутоа и од сите крвни единици да имаме свежа крв. Како што велат, потребите на болничкиот систем се околу 150 единици крв на дневна основа, така што секогаш треба да бидеме спремни со резерви достапна крв – истакна Валкановска.

Александра Валкановска, стручен соработник во Црвен крст на Град Скопје, во изјава за МИА истакна дека особено е важна оваа крводарителска акција, затоа што се случува во летниот период.

Таа додаде дека крв даруваат дарители од разни возрасти.

– Од секоја генерација даруваат крв. Она што е особено значајно за нас е младите да ги мотивираме да даруваат крв затоа што, всушност, тие се иднината – младите. Така што, да, имаме и таргет кон младите и позитивни примери и социјалните медиуми ги користиме, секаков начин на мотивација. Затоа што, генерално, средновечната популација се најчесто крводарители во Македонија и многу е важно некој да ги наследи, да продолжи да дарува крв. Така што, да, работиме и со младите – истакна таа.

Како што информира организаторот на настанот, во текот на летните месеци бројот на крводарувања бележи намалување. Годишните одмори, патувањата, високите температури и променетиот ритам на секојдневието се дел од причините поради кои граѓаните поретко се одлучуваат да даруваат крв. Во исто време потребата од крв не се намалува. Секојдневно, крвта е неопходна за хируршки интервенции, лекување пациенти со тешки заболувања, лица повредени во сообраќајни незгоди, породувања, како и во други итни медицински состојби. На здравствениот систем во нашата држава му се потребни околу 150 единици крв дневно за непречено обезбедување на потребите на пациентите.

Како што беше најавено, на акцијата, покрај крводарителите од Скопје, ќе им се придружат и доброволни крводарители од Куманово, Свети Николе, Штип, Велес, Кочани и Крива Паланка, со што уште еднаш ќе се испрати силна порака дека хуманоста и солидарноста не познаваат граници.

– Една единица крв може да спаси и до три животи. Ова лето одвојте малку време и дарувајте крв – е пораката што беше упатена од оваа крводарителска акција.