Крива Паланка доби нов плоштад по 50 години

Во општина Крива Паланка денес официјално беше пуштен во употреба новиот градски плоштад со градски парк, инвестиција вредна околу 800.000, реализирана со потпроектот  „Крива Паланка-Источна порта кон Европа (Фестивалска туристичка дестинација)“.

На отворањето присуствуваа заменик претседателот на Владата задолжен за борба против корупција и криминал, одржлив развој и човечки ресурси, Љупчо Николовски и вицепремиерот задолжен за економски прашања, координација на економските ресори и инвестиции, Фатмир Битиќи, градоначалникот на Општина Крива Паланка, Борјанчо Мицевски, претставници од Проектот за локална и регионална конкурентност, министерот за внатрешни работи, Оливер Спасовски, градоначалници од Североисточниот регион, вработени во администрацијата во општината.

Извршена е целосна реконструкција на плоштадот со зачувување на автентичните обележја, направено е партерно уредување, асфалтирање, поплочување со бекатон, изградба на мал амфитеатар, целосна замена на комуналната инфраструктура, користење на старата коцка и зачувување на градската фонтана.

– Овој плоштад му дава европски лик на градот и ќе биде место каде што не само жителите на Крива Паланка, туку и домашните и странските посетители ќе имаат можност да го посетат и да уживаат. Ова говори за одговорноста и оправданоста на сите коишто се заложија за овој историски проект за Крива Паланка. Ова е само еден од многуте проекти, што ги реализиравме и се гордост за градот, за жителите, проекти кои се значајни заради унапредување на културниот развој и социјалниот живот, изјави Николовски.

– После 40 години се рехабилитира регионалниот пат Крива Паланка кон Огут којшто завршува овие денови и од Крива Паланка до Луке. Завршена е рехабилитацијата на регионалниот пат Ранковце – Крива Паланка во должина од 21 километар и тоа беше првиот проект на којшто се фокусиравме. Завршен е уште еден, еден од најлошите патиштата тоа е Узем-Тораница. Во полна пареа е изградбата на експресниот пат едната делница од Крива Паланка до Ранковце, и во финална фаза е и другиот лот од изградбата. Се гради интензивно и третата лента од патот Крива Паланка до Деве Баир, а непречено се одвива и реконструкцијата на магистралниот пат Куманово – Страцин, додаде Николовски.

Потпроектот „Крива Паланка-Источна порта кон Европа“ е реализиран во рамки на Проектот за локална и регионална конкурентност, кој е во вкупна вредност од околу 21 милион евра, а е финансиран од Владата на Република Северна Македонија и Европската Унија.

– Со проектот за локална и регионална конкурентност се реализираа 57 потпроекти во  десет различни дестинации во нашата земја. Потпроектот е во вредност од 48,1 милион денари или 800 илјади евра, а во Крива Паланка ќе бидат реализирани уште три одобрени проекти, кои се финансирани со средствата од Владата, од таканаречената ТАВ Програма, со вкупен буџет од 29,6 милиони денари, или околу 480 илјади евра, а истите вклучуваат реконструкција и изградба на локални патишта во рамките на општината, со што значително ќе се подобри инфраструктурата на истата, истакна Битиќи.

Според него, за уште поголем развој на компаниите во помалку развиените општини во Законот за финансиска поддршка на инвестиции воведена е мерка со којашто уште посилно се поттикнуваат инвестициите кои не се случуваат во Скопје.

Градоначалникот на Крива Паланка, Борјанчо Мицевски изјави дека општината во континуитет работи на проекти од ваков тип со кои се подобрува локалната инфраструктура и изгледот на градот.

Директорката на проектот, Антонија Шишак, соопшти дека ПЛРК е водечки проект за развој на туризмот во државата преку кој се поддржани 57 потпроекти кои ги спроведуваат општини, микро и мали претпријатија, како и асоцијации кои работат во областа на туризмот во сите 10 туристички дестинации низ земјава.

Целта на проектот е да го зголеми учеството на туризмот во локалниот економски развој преку подобрување на инфраструктурата, унапредување на капацитетите за сместување и угостителство, збогатување на туристичката понуда и зголемување на конкурентноста на туристичкиот сектор.