Кристофер Хил: Ангажманот на Вучиќ околу табличките е „конструктивен“

Американскиот амбасадор во Србија Кристофер Хил изјави дека имал многу добар разговор со претседателот Александар Вучиќ за разговорите меѓу Белград и Приштина што се одржаа во понеделник во Брисел. Хил го пофали „конструктивниот ангажман на Вучиќ“, изразувајќи надеж дека ќе се најде решение за проблемот со регистарските таблички на Косово.

„Имав многу добар разговор со претседателот Вучиќ за бриселскиот процес (…) Го охрабрив претседателот Вучиќ да продолжи со својот конструктивен ангажман во процесот, со надеж дека ќе најдеме решение. На крајот на краиштата, двете страни ќе треба да бидат вклучени, но конструктивниот пристап е вистинскиот. Имам целосна доверба кога искусни луѓе како високиот претставник на ЕУ Жозеп Борел и Мирослав Лајчак работат на ова прашање, дека може да се дојде до решение“, изјави Хил на новинарите пред Палатата Србија, по средбата со претседателот на Србија.

Тој подвлече дека САД многу ја ценат работата што ЕУ ја прави во дијалогот меѓу Белград и Приштина и дека лично е импресиониран што човек со углед и статус на Борел вчера осум часа бил ангажиран на важни детали во врска со договор за регистарски таблички.

„Мислам дека ЕУ врши одлична работа. Не можеме да дозволиме проблемите како табличките да ги попречат поважните теми, севкупниот пристап кон клучните разлики“, рече тој.

Косовскиот премиер Албин Курти синоќа го прифати барањето на американскиот амбасадор во Косово да се одложи одлуката за 48 часа казнување на сопствениците на возила со српски регистарски таблички, но амбасадорот Хил смета дека тоа не е доволно.

„Мислам дека ЕУ јасно стави до знаење дека се потребни повеќе од 48 часа, дека на тоа би сакала да додаде уште 363 дена. „Ние (САД) сме целосно синхронизирани со Унијата“, рече тој.

Хил додаде дека нема да ги оцени вчерашните разговори во Брисел како „пропаднати“, и дека се потребни дополнителни разговори и дека двете страни треба да бидат флексибилни за да се дојде до решение.

Претседателот Вучиќ на својот Инстаграм профил објави дека го информирал амбасадорот Хил за последната рунда разговори меѓу Белград и Приштина во Брисел и истакна дека Србија останува искрено посветена на дијалогот и на мирно решавање на сите отворени прашања.

Тој изјави дека со американскиот амбасадор ја споделил загриженоста на Србија за безбедноста на Србите во Косово во светло на последните случувања, заблагодарувајќи им се на САД за нивната вклученост во смирувањето на тензиите и спречувањето на понатамошна ескалација.

„Србија останува искрено посветена на дијалогот и на решавање на сите отворени прашања мирно и со добра волја, со цел да се зачува тешко стекнатиот мир и стабилност на целиот регион“, изјави Вучиќ.

Во Брисел вчера немаше договор меѓу Белград и Приштина за регистарските таблички. Претседателот на Србија го прифати предлогот на ЕУ за решавање на проблемот, а премиерот на Косово не, изјави шефот на европската дипломатија Жозеп Борел.