Кремљ: Членството на Финска во НАТО „дефинитивно“ е закана за Русија

Кремљ вели дека планот на Финска за приклучување кон НАТО е „дефинитивно“ закана за Русија и дека проширувањето на воениот блок нема да ги направи Европа или светот постабилни.

Говорејќи пред новинарите портпаролот на Кремљ, Дмитриј Песков, рече дека чекорите преземени од Финска за приклучување кон НАТО се причина за жалење и причина да се наметне симетричен одговор, пренесува Ројтерс.

Тој додаде дека Финска презела „непријателски чекори“ против Русија.

На прашањето каква форма ќе биде одговорот на Русија, тој рече: „Сè ќе зависи од тоа како ќе се одвива овој… процес на проширување на НАТО, степенот до кој воената инфраструктура ќе се приближи до нашите граници“.

Генералниот секретар на алијансата Јенс Столтенберг вели дека членството на земјата ќе ги зајакне и НАТО и самата Финска.

„Доколку Финска одлучи да аплицира, тие би биле топло добредојдени во НАТО, а процесот на пристапување би бил мазен и брз“, вели Столтенберг.

Финска вели дека сака да се приклучи на алијансата „без одлагање“.

Столтенберг додава: „Финска е еден од најблиските партнери на НАТО, зрела демократија, членка на Европската унија и важен придонесувач за евроатлантската безбедност“.