Лидерите многу бараа – засега ништо не договорија
Првиот приоритет е европскиот пат, па интересите на политичките партии. Никој нема да биде кочничар, рече Ковачевски по лидерската средба
По четири часа разговори, заврши лидерската средба на која била отворена дискусија за уставните промени, но не биле донесени конкретни заклучоци, иако од страна на Владата имало предлог околу кои позиции да се усогласат политичките лидери. Премиерот Димитар Ковачевски во изјавата за новинарите порача дека никој не треба да биде кочничар на државата и дека, иако не постигнале консензус, клучно е што се сретнаа.
Ковачевски: Нема сами да си ставаме пречки и да кочиме
„Пред нас стојат многу предизвици и затоа важна е деблокадата на Собранието за да се донесат важни реформи. Не смееме да дозволиме уставните измени да бидат пречка која сами ќе си ја поставиме. Да бидеме мудри и да го искористиме поволниот момент во ЕУ. Не е време за поделби. Ќе се формира собраниска група која ќе се грижи реформите да не стојат во место. Првиот приоритет е европскиот пат па интересите на политичките партии. Никој нема да биде кочничар“, рече Ковачевски по лидерската средба во Собранието која ја иницираше тој, а ја прифатија речиси сите политички партии.
„Вложивме многу труд да дојдеме до оваа фаза.Конечно после 17 години гордо можеме да кажеме дека сме земја која ги започна преговорите со ЕУ. Имавме многу предизвици, требаше да се носат тешки одлуки. Но, истовремено знаевме која е целта – НАТО И ЕУ, две стратешки цели кои сме должни да ги исполниме“, изјави премиерот.
Тој додаде дека земјава последните пет години направи крупни чекори и успеа да се докаже како достоен НАТО и ЕУ партнер.
„Еден од тие чекори беше и европскиот предлог кој го добивме летово, за време на француското претседателство. Свесни за сите негови предности и слабости го препознавме како можност за деблокирање на процесот и придвижување напред. И самите бевте сведоци, го усвоивме во Собранието во атмосфера на тешка седница, тензии и недоверба“, рече Ковачевски.
Премиерот додаде дека заклучоците донесени во Собранието гарантираат почеток на преговорите со ЕУ и скрининг процесот со гарантиран јазик и идентитет и гаранција дека историските прашања се надвор од преговарачката рамка.
„Отворањето на преговорите е огромен успех за сите нас. Процесот е конечно започнат и сега е важно да напредуваме во реформите, заради граѓаните и заради градење на европски институции кои ќе работат по европски стандарди и принципи. Низ преговорите ќе ни се отвараат повеќе фондови, а на долг рок – бенефитот ќе го имаат нашите граѓани“, уверуваше Ковачевски.
Тој го престави и предлогот за заклучоци, што не биле усвоени, а во кои стоело дека евроинтеграцијата е надпартиски интерес, дека согласно нашиот интерес за членство сите чинители во Собранието треба да дадат поддршка, а при водењето на преговорите со ЕУ треб да се придружуваме на позицијата за јазикот и идентитетот како елементи за кои нема да се преговара, а во согласност со резолуцијата што беше усвоена во Собранието.
Премиерот изрази задоволство што сите претседатели на парламентарни партии освен двајца присуствувале на средбата.
„Клучно е дека седнавме на маса да разговараме за овие прашања. Ние како Влада сме отворени за соработка и сега е потребна инклузивност и обединетост, а темата за ЕУ да не е терен за дневна политика“, побара премиерот.
Мицкоски: Ни дадоа смешен документ, не го прифатив!
„На лидерската средба не се разговараше за ниедна важна тема“, изјави по средбата претседателот на ВМРО- ДПМНЕ, Христијан Мицкоски.
„Не стана збор за инфлацијата од 20 проценти , не стана збор ниту за една тема што им е важна на граѓаните“ , рече Мицкоски со констатација дека Владата се обидува да направи дефокус од вистинските проблеми и дека се фокусирале само на некои теми како евроинтеграцијата , за која што многу пати се разговарало.
„Се делеше еден смешен документ како заклучоци , што се разбира не го прифативме“, изјави Мицкоски.
„Немаат мнозинство за уставни измени и водејќи се од овој заклучот, излезот е Парламентот да се распушти, да имаме техничка Влада и да одиме на избори“, рече Мицкоски.Мицкоски додаде дека преговарачката рамка ваква каква што е не е вистинскиот пат кон Европа.
Ахмети: Надминете ја носталгијата, да се вратиме на рационалноста
Претседателот на ДУИ, Али Ахмети рече дека на средбата повикал да не се отвораат теми од минатото туку да се гледа кон иднината. Зборувајќи за уставните измени, Ахмети истакна дека ни требаат повеќе чекори кон ЕУ.
„Уште на средбата повикав да се надмине носталгијата и да се вратиме на рационалноста, бидејќи ако отвориме прашања кои припаѓаат на минатото, тешко дека ќе се дефинираме за иднината. Секое минато што се отвора не и служи на иднината, не им служи на генерациите и генерациите што доаѓаат. Ни требаат поконкретни чекори кон ЕУ“, рече меѓу другото Ахмети.
За него не беше проблем што договор не е постигнат на оваа средба.
„ Се дебатираше за сите теми. Според моите процени, не мора да значи дека на една средба да ги оценуваме сите разлики и се разбира дека разлики имаше, меѓутоа се надевам дека оваа средба нема да биде последна, туку да се продолжи со ваквите средби се до приближување на разликите кои што постојат меѓу политичките партии за да се гради заедничка стратегија за тоа како да ја промениме денешницата, со еден подобар напредок и прогрес во иднина. Доминираше смиреноста и рационалноста и тоа ми остави впечаток од оваа средба. Посакувам оваа смиреност да продолжи до приближување на разликите меѓу мнозинството и малцинството“, изјави Ахмети.