Ковачевски: Мицкоски секое утро проверува што кажал Апасиев

Премиерот Димитар Ковачевски на трибина во велес го нарече лидерот на Левица Димитар Апасиев „агент на хаосот“ кој верува дека, колку  е полошо за земјата – толку е подобро за него.

-Неговата цел е да запали оган и да уништи се што е создавано, ете каде многу луѓе грешат, и тука е токму опасноста. Економската криза и фрустрацијата ги очајуваат луѓето и ги тераат да размислуваат да му дадат шанса. Во руралните средини, меѓу младите, дури и меѓу средната класа кои се борат под кризата на трошоците за живот. Не се лажете – тој станува посилен. Причината за ова е што Мицкоски е слаб, нема став, нема визија. Мицкоски секое утро кога отвора очи прво што прави- проверува во телефонот што кажал претходната вечер Апасиев, па водејќи се од тоа во Белата Палата под судска заплена, дава наредби каква ќе биде нивната комуникација тој ден, порача Ковачевски.

Ковачевски оцени дека токму поради тоа Мицкоски се однесува лицемерно, дека еден ден кажува едно, друг ден второ.

– Да не е случајно ВМРО-ДПМНЕ помалку екстремна од Левица за да не им пребега некој член во партијата на Апасиев. Затоа Мицкоски еден ден вика дека ја поддржува ЕУ, а веќе следниот ден во Собранието ја блокира сета законска регулатива што се однесува на ЕУ. Човек без визија заедно со пироман со визија за хаос. Додадете го во мешавината Груевски, кој под неговото 11-годишно владеење, земјата беше блокирана во Европа – и тука е совршената бура. Резулатот од тоа може да биде закочена интеграцијата во ЕУ. Инвеститорите ќе си заминат, младите ќе бегаат, економијата ќе крахира а земјвата ќе се врати во темното минато каде 11 години беше заглавена, додаде Ковачевски на трибината „Силно и одлучно кон иднината“.