Ковачевски: Една телевизија известува како да е компанија за трговија со енергија

Транспарентноста во државата е унапредена во последнава година и никогаш не се случило кој било уредник или новинар да добие повик од Владата за да се влијание врз уредувачката политика на медиумите, изјави денеска премиерот Димитар Ковачевски во одговор на новинарско прашање во врска со јавното етикетирање на две телевизии од страна на лидерот на ДУИ, Али Ахмети.

Коментирајќи ја синоќешната изјава на Ахмети, во која тој изрази незадоволство од медиумското известување на две телевизии во врска со случувањата во неговата партија, Ковачевски рече дека таквата изјава веројатно е дадена врз основа на одредени факти и упати објаснување за тоа да се побара од лидерот на ДУИ.

– Можам само да кажам мое лично мислење за тоа како одредени медиуми се однесуваат. Во државата има медиум чијашто уредувачка политика повеќе наликува на компанија што тргува со енергенси, а има и медиум чијашто уредувачка политика повеќе личи на уредувачка политика на партиски сектор за комуникација, изјави Ковачевски на денешната прес-конференција на која беше презентирана реализацијата на капиталните инвестиции во земјава во 2022 година.

Ковачевски истакна дека нема да дозволи враќање на некои минати времиња и дека денес медиумите можат слободно да ја одредуваат својата уредувачка политика така како што сметаат, додавајќи дека постојат институции во државата што го регулираат работењето на медиумите и тие се независни од Владата.

На изјавата на премиерот реагираше  Самостојниот синдикат на новинари и медиумски работници.

-Сметаме дека државните функционери, особено кога се работи за најмоќната државна позиција, мораат да внимаваат на искажаниот збор бидејќи, вперувањето со прст од различни причини кон одредени медиуми ги става во незавидна позиција медиумските професионалци, кои потоа се цел на разни напади, говор на омраза и слично.

Ваквото етикетирање на медиумите претставува и напад врз слободата на изразување и слободата на медиумите, односно врз новинарите и медиумските работници, што не смее да се случува во едно демократско општество. Предочуваме, дека јавноста односно граѓаните не смее никој да ги потценува и тие се оние кои го носат крајниот суд за тоа дали одреден медиум си ја врши добро или не работата која е од јавен интерес, стои во реакцијата.