Костадиновска-Стојчевска во работна посета на културните институции во Прилеп

Министерката за култура Бисера Костадиновска-Стојчевска денеска беше во работна посета на институциите од областа на културата во Прилеп, соопшти Министерството за култура.

Во Центарот за култура „Марко Цепенков“, како што се наведува во соопштението, Костадиновска-Стојчевска се запозна состојбата и планираните активности на оваа институција, а беше информирана и за текот на работите за изработката на проектно-техничката документација за реконструкција со доградба и надградба на Центарот за култура, со цел обезбедување на простор за потребите на театарот.

-Согласно договорот предвидено е истата да биде завршена најдоцна до средината на оваа година, по што ќе следува распишување на тендер за изведувач на градежните работи. За оваа намена, за оваа година од буџетот на Министерството за култура обезбедени се шест милиони денари, рече министерката Костадиновска-Стојчевска.

За време на посетата, министерката придружувана од в.д. директорката Јасмина Мицовска-Станковска, ја разгледа и изложбата на маски по повод јубилејното 20-то издание на карневалот „Прочка 2022“.

Костадиновска-Стојчевска го посети и Заводот за заштита на спомениците на културата и музеј- Прилеп, каде директорот Благој Атанасовски ја запозна со позначајните проекти, кои оваа институција од областа на заштитата на културното наследство ќе ги реализира во текот на годинава.

Министерството за култура во рамки на Годишната програма  од буџетот издвои повеќе од седум милиони денари, за 17 проекти, меѓу кои: прва фаза од проектот за заштита, реконструкција и конзервација на витражи и фасадна  заштита на  куполата на споменикот „Илинден“ во Крушево, изработка на Основен проект за конзервација и реставрација на куќа на ул. „Коча Миленку“ бр. 15. во Крушево, конзервација и реставрација на иконостасот од црквата „Свето Благовештение“, археолошки истражувања на локалитетот Селиште, локалитетот Бедем – Стибера кај село Чепигово и друго, се наведува во соопштението.