Косово престана да ги покрива српските симболи на регистрациите

Владата на Косово одлучи да престане да ги покрива државните симболи на Србија со налепници на српските регистарски таблички, само пет дена откако стапи во сила одлуката на српската влада за ознаките на табличките на Република Косово. Косовската влада ја донесе својата одлука вчера, соопштија од кабинетот на Курти, а таа беше образложена како „чин на добрососедски односи и доаѓа по целосното признавање на табличките на Република Косово од страна на Србија“, се наведува во соопштението.

Косовскиот премиер Албин Курти претходно изјави, коментирајќи ја одлуката на Белград да дозволи слободно движење на возилата со таблички на Република Косово (РКС), дека Приштина ќе реагира реципрочно „штом граничната полиција документира и докаже дека Србија целосно ја спроведува својата одлука и без пречки “.

Србија го спречи слободното движење на возилата од Косово

Владата на Србија на 25 декември одлучи да овозможи слободно движење на сите возила од Косово и Метохија, со образложение дека оваа одлука произлегува од договорот меѓу двете страни од 2011 година.

На сите гранични и административни премини, најави Србија, ќе биде објавено известување дека „учеството во сообраќајот“ е дозволено за сите возила регистрирани на Косово „исклучиво од практични причини, со цел да се олесни положбата на поединците и да се овозможи нивна слобода на движење“. 

Српските власти објаснија дека одлуката не може да се толкува како признавање на независноста на Косово и дека не го прејудицира одредувањето на конечниот статус. Ова е обид да се реши спорот кој во претходните месеци подгреваше тензии и инциденти меѓу двете страни.

Косово почна со пререгистрација на возилата со српски регистрации
Во октомври минатата година, владата на Косово започна процес на пререгистрација на возила со српски таблички за градовите во Косово на таблички РКС, на што реагираше Белград со повлекување претставници на Србите од косовските институции, вклучително и полицијата.

Следеа серија кризи и тензии на северот, кои кулминираа со акција на српска паравоена група и конфликт со косовската полиција во северното косовско село Бањска, кога беа убиени еден косовски полицаец и тројца членови на група вооружени Срби.