Корона поздрав во Скопје: Димитров и Жбогар се потчукнаа со лактите
Шефот на македонската дипломатија Никола Димитров и амбасадорот на ЕУ во Македонија Самуел Жбогар се поздравија со потчукнување на лактите, промовирајќи го новиот корона поздрав денес на панелот: Владеење на правото, миграции, безбедност/хибридни закани, што се одржа во рамки министерскиот состанок на Берлинскиот процес во Скопје.
Во време која коронавирусот зема силен замав, здравствените власти, но и лидерите и државниците постојано повикуваат луѓето да избегнуваат ракувања, пријателски бакнежи, прегрнувања и слични секојдневни начини на општење. Се чини, најсоодветна замена за тоа е поздравот со лактите.
За разлика од нив, министерот за надворешни работи на Србија Ивица Дачиќ ја игнорираше оваа препорака и на панелот, на пријателски начин разговараше со шефицата на бугарската дипломатија Екатерина Захариева.
Македонија и Бугарија беа домаќини на состанокот, но дел од гостите откажаа присуство заради заразната болест. Шефовите на дипломатиите на Германија и Италија, Хајко Мас и Луиџи ди Мајо утрово го откажаа летот кон Скопје, на состанокот на министрите за надворешни работи не дојде и францускиот претставник- заменик генерален секретар во министерството за надворешни работи Андре Паран.
Фото: Борис Грданоски