Консензус за изборите или ќе решат институциите

Добро е сите да учествуваат во изборниот процес, а политичките партии да го покажат демократскиот капцитет и да понудат опции за граѓаните, рече премиерот Оливер Спасовски по денешната координативна средба  на кандидатите за пратеници за Изборна единица 2 од коалицијата на СДСМ  во Куманово.

-Јас посакувам политичките партии да имаа разбирање и консензус, пред се за почитувањето на Уставот и на законите. Се разговараше, добро е за демократскиот капацитет сите политички партии да учествуваат на изборите, а во оној момент кога не можат да се договорат политичките лидери, одговорноста мора да ја преземат институциите на системот. Ние вчера разговаравме и на Советот за безбедност се донесе одлука за продолжување на вонредната состојба за уште 14 дена, пред се, заради спроведување на економските мерки, заради можноста да се носат одлуки, уредби со законска сила за имплементација на овие мерки и согласно на тоа, ако се пресмета детално ќе видите дека изборите треба да се одржат на 5 јули, рече Спасовски, одговарајќи на новинарско прашање дали СДСМ ќе излезе на избори без постигнат консензус со ВМРО-ДПМНЕ и како ќе се спроведува кампањата.

-Со ова последно продолжување на вонредната состојба, датумот се фиксира на 5 јули, заклучи Спасовски.

Тој вели дека било какво пролонгирање не е можно – ниту од правен, ниту од праведен аспект, со оглед на тоа што по 5 јули граѓаните ќе користат летни одмори, а на есен се заканува нов бран на ковид-19. Очекува дека политичките партии ќе бидат на висината на сопствената одговорност и дека ќе го покажат својот демократски капцитет за одржување на овие избори, односно ќе учествуваат на изборите.

-На крајот од краиштата и во нормални услови и во вонредни услови во какви било услови, тој кој што сака да учествува на избори, политичкиот мегдан е тука пред нас. Јас очекувам дека партиите ќе ги вкрстат своите копја и ќе разговараме на ниво на концепции, на ниво на визии за граѓаните и на основа на тоа ќе ги повикаме граѓаните да носат одлука, рече Спасовски.

Што се однесува до кампањата, додаде Спасовски, ќе се користат социјалните мрежи, медиумска кампања, преку личен пристап, ќе се разговара со граѓаните за сите прашања од нивен интерес, ќе се презентира и понуди програмата, платформата и визијата на СДСМ за тоа што ќе се направи во идниот период и ќе се побара поддршката од граѓаните.

 

„Изборите се поважни за здравјето на граѓаните и од кафеаните и од спортските натпревари, славите и веселбите. Ако можеме да пазаруваме секој ден во маркет или на пазар, да седиме во ресторан и состанок под маски, тогаш можеме со сигурност и да одиме на избори“, рече Спасовски.

Тој додаде дека вирусот не е за потценување, но нема простор за паника. Зголемувањето на бројот на заболени, Спасовски рече дека се должи на два фактори, меѓу кои саботажите и неодговорното однесување на Наќе Чулев како министер, како и зголемениот обем на тестирање и олабавувањето на мерките со цел животот да продолжи, а економијата да се рестартира.