Концертна промоција на албумот Dzijan Emin & The Magical Orchestra во Филхармонија

Концертна промоција на првенчето на ZJM Records, новиот албум на матичниот диригент на ЗЏМ Биг Бенд, оркестарот, композитор и мулти-инструменталист, маестро Џијан Емин ќе се одржи утревечер во Филхармонијата.

Магичниот оркестар кој ќе изведе авторски композиции на Џијан Емин, под негово диригентство, е составен од членови на ЗЏМ Биг Бенд Оркестарот и гудачи од Македонската Филхармонија.

Џијан Емин е еден од водечките современи музичари во земјава и регионот, кој се здобива со голема репутација низ целиот свет поради соработката со светски познати музичари како Дерик Меј, Хуан Аткинс, Џеф Милс, Франческо Тристано, но и уметници – добитници на Оскар и Греми како А.Р. Рахман, Френк Лондон, Малком Брн, Вилијам Паркер, Боб Стјуарт, Франческо Беарзати, Лука Акино, Џанлука Петрела, Питер Херберт, Дамо Сузуки, „Ер“, Глорија Естефан, Рико Волшебникот (Даф Панк).

Тој е сеопфатен музичар со големо музичко искуство и долгогодишна кариера – од главен хорнист во Македонската филхармонија, до вешт изведувач на импровизирана музика или џез (на еден од многуте инструменти што ги совладал); од диригирање на меѓународни оркестри до компонирање и аранжирање партитури за филм и театар, до свирење гитара или тастатури со рок групи, до продуцирање албуми, а се јавува и како уметнички директор на фестивали, секогаш додавајќи скапоцен оригинален глас и неспоредлива музикалност во неговата изведба.

Здружението на џез музичари и слободни уметници – ЗЏМ Скопје, преку издавачката куќа ZЈМ Records продолжува да се залага за афирмација на џез музичарите од земјава и регионот, заедно работејќи на подобрување на целокупната џез култура кај нас, збогатувајќи ја нашата културна сцена со нови квалитетни музички изданија.

Концертот Dzijan Emin & The Magical Orchestra е во 20 часот во Филхармонијата.