Компаниите во ТИРЗ во јануари реализирале извоз од 275,4 милиони евра
ТИРЗ ја започнува годинава со позитивен тренд на извоз и зголемување на бројот на работни места, покажува редовната месечна анализа
Компаниите во ТИРЗ во јануари реализирале извоз од 275,4 милиони евра што е највисоко ниво во последниве пет години. Споредено со јануари 2022 извозот е зголемен за 11 отсто, односно е за 9 отсто повисок од 2021, и за 45 отсто и 15 отсто повисок споредено со 2020 односно 2019 година.
Позитивниот тренд на раст продолжува и во однос на увозот. Компаниите во ТИРЗ во јануари оствариле увоз од 221 милиони евра. Тоа е за 8 отсто повеќе споредено со истиот период во 2022, односно за 44 отсто повеќе од јануари 2020 и за 15 отсто повеќе споредено со 2019. Увозот во јануари 2021 бил повисок за 10 отсто, покажува анализата.
Особено позитивен тренд на раст има кај нето извозот кој во јануари е 24,5 отсто, што меѓу другото се должи на зголемените инвестициски активности во Зоните и зголемениот број на работни места.
Бројот на вработени во зоните во јануари достигна речиси 16,400 што е за 16% повисок од јануари 2022. Само во првиот месец од годинава во компаниите во зоните се отворени речиси 80 нови работни места. Инаку ТИРЗ ја заокружи минатата година со 2300 новоотворени работни места и највисок извоз досега од 3,7 милијарди евра, со што е 2022 е најуспешната година од постоењето на зоните, се вели во соопштението до медиумите.