Комисија за јавно-приватен дијалог: Коморите со список барања за подобро функционирање на фирмите

Претставниците на стопанските комори во земјава на денешната седница на Комисијата за јавно -приватен дијалог доставиле преглед на барања важни за функционирање на фирмите.

Вицепремиерот Битиќи во воведното обраќање посочил дека јавно-приватниот дијалог е континуиран процес и со редовните месечни средби помеѓу Владата и стопанските комори се креираат најдобри решенија и се создаваат услови за побрз и одржлив економски развој.

Во име на сите членки на Платформата, претседателот на Стопанската комора на северозападна Македонија, Неби Хоџа, достави ажуриран и синтетизиран преглед на барања и прашања од компаниите-членки на коморите до Владата и надлежните институции, кои се важни за нивното нормално функционирање.

– Вицепремиерот Битиќи посочи дека Владата е партнер на стопанството, сите отворени прашања ќе се дискутираат, а за секое барање ќе се спроведат соодветни анализи и преку инклузивен и транспарентен процес, со меѓусебна координација и консултација на јавниот и приватниот сектор, ќе се донесат најдобрите можни  решенија кои ќе обезбедат подобра бизнис-клима и услови за побрз економски раст, соопшти Кабинетот на вицепремиерот Битиќи. 

На состанокот со кој претседавал Битиќи, присуствувале и министрите за финансии и за труд и социјална политика, Фатмир Бесими и Јагода Шахпаска, претставници од Министерството за економија и претседателите на четирите стопански комори членки на Платформата: Бранко Азески од Стопанската комора на Македонија, Данела Арсовска од Сојузот на стопански комори, Неби Хоџа од Стопанската комора на северозападна Македонија и Анета Антова Пешева од МАСИТ.

Редовниот состанок на Комисијата  произлегува од Меморандумот потпишан помеѓу Владата и четирите стопански комори членки на Платформата за јавно-приватен дијалог.