Колони возила за влез во Скопје, граѓаните гневни

 

Граѓаните се изнервирани од неможноста да влезат во Скопје од правец на Велес и Куманово, затоа што пред некој ден започна реконструкцијата на булеварот „Александар Македонски“.

– Секоја чест на градоначалникот Шилегов за блокирање на автопат понеделнички…хаос од неколку километри на автопат, а со самото тоа и десетици километри низ улиците на Маџари, Автокоманда… Можеа да стават пренасочување кон обиколница. Вака во Европа? – коментира една корисничка на социјалните мрежи.

Друга пишува дека час и половина патувала од автопат до Аеродром. – Срамота е ова. Да не се изрегулира сообраќај во главен град. Разочарувачки!

Друг пишува: – Еден час возев од Ченто до Аеродром. На ни едно место нема никој да регулира сообраќај. Брза помош не може да помине, срамота!

Од Градот вчера информираа дека во тек е голема градежна офанзива за изградба и реконструкција на градските улици, па поради тоа Град Скопје ги известува граѓаните да ги користат алтернативните приоди и сообраќајници за влез во градот, пред се поради големата реконструкција на бул. „Александар Македонски“ во Општина Гази Баба.

Граѓаните можат во Скопје да пристапат преку скопската обиколница, на исклучувањето кај населба Радишани, преку новиот булевар „Христијан Тодоровски Карпош“ кон Општина Чаир како и на исклучувањата кај населба Визбегово кон Момин Поток и населба Волково кон Општина Ѓорче Петров.

Реконструкцијата на бул. „Александар Македонски“ е на потегот од крстосницата со улица „16-та Македонска бригада“ до пешачкиот мост пред клучката кај Хиподром, која го поврзува овој булевар со автопатот. Реконструкцијата се реализира фазно, а на терен истовремено се работат три од вкупно четири фази на реконструкцијата.

Булеварот ќе се реконструира во должина од 5.300 метри, што претставува најдолга делница на која Град Скопје работи во моментов.

Град Скопје уште еднаш апелира до граѓаните да бидат трпеливи и да ги почитуваат новонастанатите услови на патот како и посебните сообраќајни режими со кои се регулира сообраќајот за време на реконструкцијата на булеварот каде ќе се работи деноноќно.