Колку ќе чини првото електрично „Ферари“? Новата машина ќе звучи како бензинец

Првиот електричен автомобил од познатата компанија „Ферари“ ќе чини најмалку половина милион евра, изјавил за Ројтерс добро информиран извор.

Оваа информација, која производителот на луксузни автомобили се уште официјално не ја потврди, беше објавена во моментот на подготовките за отворање на нова производна линија во Маранело во северна Италија.

Фабриката во градот каде компанијата почна да ги произведува своите први автомобили би можела да го зголеми производството за една третина, пишува Јуроњус.

Се шпекулира дека цената на првиот електричен автомобил е далеку под просечната цена за другите возила на производителот и не вклучува специјални додатоци, кои обично ја зголемуваат конечната цена за 15 до 20 проценти. На почетокот на оваа година, автомобил со препознатливото лого на Ферари чинеше во просек 350.000 евра, комплет со додатоци и персонализирани детали.

За споредба, помалку ексклузивниот модел на куќата „Порше“ – Taycan чини од 100.000 евра нагоре.

Ексклузивноста е во срцето на брендот „Ферари“, поради што минатата година беа испорачани помалку од 14.000 автомобили.

Затоа, зголемениот производствен капацитет е храбар потег за компанијата, иако многумина веруваат дека високата цена и овозможува на куќата да го задржи својот елитен статус.

Купувачите се подготвени да поминат и до две години на листа на чекање за одредени модели, а за некои дури и место на таа листа е статусен симбол.

Според неименуван извор на агенцијата Ројтерс, новата фабрика на компанијата ќе овозможи производството да се зголеми за околу 6.000 возила годишно или до околу 20.000. Сепак, ова значи и зголемување на бројот на модели, што повторно осигурува дека има ограничувања за тоа колку примероци на автомобил може да се продаде.

Во Маранело ќе се произведуваат електрични автомобили, но и бензинци и хибриди, а се очекува фабриката да биде целосно оперативна за три до четири месеци, наведува Ројтерс.

Во април, извршниот директор на компанијата Бенедето Виња им рече на акционерите на компанијата дека „современата фабрика треба да обезбеди флексибилност и технички капацитет што ги надминува нашите потреби во годините што доаѓаат“.

Компанијата работи на уште еден електричен модел, но проектот се уште е во рана фаза, според неименуваниот извор.

„Ферари“ предвидува дека до 2026 година, околу шеесет проценти од нивниот опсег ќе бидат електрични или хибридни автомобили.

Иако електричните возила вообичаено се тивки, инженерите развиваат „звучни потписи“ кои ќе им дадат на овие моќни машини карактеристичен звук на мотор со внатрешно согорување.

„Кога зборуваме за луксузни автомобили, како нашиот, зборуваме за емоциите што можеме да им ги испорачаме на нашите клиенти, така што не зборуваме за функционални автомобили, како другите ЕВ што ги гледаме на патиштата“, изјави Виња претходно за Си-Ен-Би-Си.

„Искрено, не се сомневаме дека можеме да им понудиме уникатно искуство на нашите клиенти бидејќи можеме да ја користиме технологијата на единствен начин. Ова е она што нашата компанија го прави од самиот почеток“, додаде извршниот директор.

Во својот извештај за првиот квартал објавен во мај, „Ферари“ соопшти дека неговата главна заработка се зголемила за 13 отсто во периодот јануари-март.

Ова беше поттикнато од продажбата на модели како што е Daytona SP3 и поголема заработка од персонализација на возилото.

Испораките драстично се намалени во Кина, Хонг Конг и Тајван, иако само околу десет отсто од произведените единици се продаваат на тој пазар.