Клубот „Никола Вапцаров“ во Благоевград сепак ќе се отвори, градоначалникот се премислил

Македонскиот културен клуб „Никола Вапцаров“ во Благоевград сепак ќе се отвори.  Градоначалникот на Благоевград се премислил, како што соопштија од иницијативниот комитет и дозволил клубот да биде отворен на 30 октомври. На свеченоста, според соопштението,  поканети се и првите луѓе на македонската и на бугарска влада.

Клубот е основан од иницијативен комитет, во чиј состав е и Здружението за заштита на основните индивидуални човекови права, а ќе има за цел да ја развива македонската традиционална и модерна култура, да гради културен мост меѓу Македонија и Бугарија и да ги зајакне врските меѓу Македонците и Бугарите ширум светот, велат организаторите на настанот.

Во соопштението стои: „На 30 октомври нашиот скромен македонски културен клуб „Никола Вапцаров“ свечено ќе ги отвори вратите во Благоевград. Клубот има за цел да ја развива македонската традиционална и модерна култура, да гради културен мост меѓу Бугарија и Македонија, да ги зајакне врските меѓу Македонците во Бугарија и Македонците ширум светот.

Основан е од Иницијативен комитет, во чиј состав е и Здружението за „Заштита на основните индивидуални човекови права“, регистрирано во согласност со бугарскиот закон во Агенцијата за регистрација на 30.8.2019 година. 

„Настанот е дозволен од градоначалникот на општина Благоевград. Поканети се премиерите на Бугарија и на Македонија, амбасадори и градоначалникот на Благоевград, како и  медиумите од двете страни на границата. Поканети се и пријатели и гости од земјава и странство. Поканети се  добронамерници, кои ги споделуваат и поддржуваат нашите цели – добредојдени сте! Повелете!

Скромната прослава ќе се одржи со следната програма – отворање со поздрав кон присутните,  осветување според христијанските обичаи, поздрави од официјалните гости на прославата, положување цвеќе на спомениците на Димитар Благоев и Гоце Делчев, како и на спомен обележјето на Гоце Делчев во дворот на црквата“, стои во објавата на клубот.