Кириос го критикува Ѓоковиќ околу неговите барања за карантинот пред Австралија опен

Ник Кириос му се придружи на поранешниот играч на Дејвис купот, Сем Грот, во критиките за Новак Ѓоковиќ, откако светскиот рекет број 1, наводно, им напишал на организаторите на Австралија опен барајќи од нив да ги ублажат карантинските ограничувања за играчите. Патниците кои пристигнаа на три чартер летови се ставени во карантин, вклучувајќи повеќе од 70 играчи кои не се во можност да тренираат надвор од своите простории 14 дена пред почетокот на првиот грен слем турнир годинава на 8 февруари. Шпанска тениска веб-страница објави дека Ѓоковиќ му пишал на извршниот директор на Тенис Австралија, Крег Тили, со список на „барања“, барајќи намалени периоди на изолација и играчите да се преселат во „приватни куќи со тениски терени“.

Кириос го критикуваше Ѓоковиќ во 2020 година за организирањето на Адриа тур на Балканот, каде што повеќе играчи, вклучувајќи го и највисоко рангираниот Србин, добија вирус. „Ѓоковиќ е алатка“, рече Кириос, рангиран на 47. место во светот, на Твитер.

Ѓоковиќ, кој се одлучи да изнајми приватна куќа наместо да престојува во хотел за време на Отвореното првенство на САД 2020 година, е меѓу играчите кои поминуваат во задолжителен карантин во Аделаида пред да отпатуваат за Мелбурн.

Многу Австралијци ја доведоа во прашање одлуката за домаќин на турнирот, при што организаторите донесоа со авиони 1.200 играчи и нивните придружници кога илјадници граѓани се заглавени во странство поради пандемијата Ковид-19. Премиерот на Викторија, Даниел Ендрјус, рече дека тенисерите заглавени во изолација во хотелските соби во Мелбурн нема да добијат посебен третман, околу прашањата за барањата на Ѓоковиќ. Ендрјус за локалните медиуми на прес-конференција изјави: „Луѓето можат слободно да обезбедат список со барања. Но, одговорот е не… Овде нема посебен третман“. (Ројтерс)