Кинеските градови тонат поради градежништвото и црпењето вода

Речиси половина од големите градови во Кина тонат поради пумпање вода и зголемената тежина на зградите поради нивното проширување, пишува Би-би-си.

Некои градови брзо тонат, а секој шести тоне повеќе од 10 мм годишно. Забрзаната урбанизација во Кина во изминатата деценија значи дека се испумпува повеќе вода за да се задоволат потребите на луѓето, велат научниците. Во крајбрежните градови слегнувањето им се заканува на милиони луѓе поради поплавите и подигањето на нивото на морето.

Кина има долга историја на борба со слегнување на земјиштето, а Шангај и Тијанџин покажаа знаци на тонење уште во 1920-тите. Шангај потонал повеќе од три метри во изминатите 100 години. Во поново време, има повеќе докази за слегнување на земјиштето во многу градови кои брзо се развиле во текот на изминатите децении.

Со цел да се разбере сериозноста на проблемот, тим од истражувачи од неколку кинески универзитети анализирале 82 града, од кои секој има население од повеќе од 2 милиони луѓе. Тие користеа податоци од сателитот Сентинел-1 за да го измерат вертикалното движење на земјата низ Кина.

Гледајќи го периодот помеѓу 2015 и 2022 година, тимот откри дека повеќе од 45 проценти од урбаните области тонат за повеќе од 3 mm годишно. Околу 16 проценти од урбаното земјиште тоне повеќе од 100 mm годишно, што научниците го сметаат за брзо слегнување.

Сето ова значи дека 67 милиони луѓе живеат во области на брзо слегнување на земјиштето. Научниците велат дека градовите со најголеми проблеми се наоѓаат во пет региони, кои се истакнати на мапата. Слегнувањето е под влијание на многу фактори, вклучувајќи ја геологијата и тежината на структурите. Но, големиот фактор е всушност загубата на подземните води. Ова во суштина значи дека водата се испумпува од под или во близина на градовите за користење од локалното население. Ова е забележано во неколку урбани области низ светот, вклучувајќи ги Хјустон, Мексико Сити и Делхи.

Во Кина, истражувачки тим го поврза пумпањето вода од 1.600 набљудувани бунари со зголемените нивоа на слегнување на земјиштето.

На слегнување влијаат и урбаните транспортни системи, како и ископувањето на минерали и јаглен. Во северниот регион Пингдингшан, кој е една од најголемите области за ископ на јаглен, земјата се урива со екстремна брзина од 109 mm годишно. Авторите на истражувањето предупредуваат дека комбинацијата на слегнување на земјиштето и пораст на нивото на морето го прави населението ранливо на поплави предизвикани од климатските промени.

Научниците тврдат дека копното тоне побрзо од зголемувањето на нивото на морето, загрозувајќи милиони луѓе. Сепак, постојат стратегии кои можат да помогнат да се забави слегнувањето.

Слегнувањето на земјиштето е проблем и во другите урбани центри во Азија, вклучувајќи ги Осака и Токио во Јапонија.