Кинеските берзи паднаа трет ден по ред, другите во пораст

Цените на кинеските акции паднаа денеска трет ден по ред, бидејќи инвеститорите се загрижени за бавниот раст на втората по големина економија во светот, додека другите регионални берзи го следеа растот на Волстрит.

Индексот МСЦИ на азиско-пацифичкиот регион беше во минус од 0,3 отсто околу 07:00 часот, слабеејќи трет ден по ред. Во исто време, индексот Никеи порасна за 0,8 отсто на берзата во Токио, додека цените на акциите во Австралија пораснаа за 0,5 отсто. Во Јужна Кореја, Шангај и Хонг Конг тие паднаа меѓу 0,2 и 1,2 отсто, пренесе Хина.

Берзите во Кина под притисок

Кинеските берзи сè уште се под притисок поради неодамна објавените податоци кои покажаа дека економијата на земјата закрепнува од кризата со корона побавно отколку што се надеваа инвеститорите.

Ова е последица на слабоста и на домашната и на странската побарувачка. И странската побарувачка нема да закрепне се додека централните банки на западните земји ги зголемуваат каматните стапки поради високата инфлација, која го забавува растот на економиите.

Берзанските индекси во Јапонија и Јужна Кореја го следат вчерашниот раст на Волстрит. Дау Џонс (Dow Jones) зајакна за 1,1 отсто, додека СиП 500 (S&P 500) порасна за 0,7 отсто, а Насдак (Nasdaq) индексот за 0,8 отсто.

Истовремено, најмногу порасна индексот СиП 500 на банкарскиот сектор, 1,9 отсто, достигнувајќи го највисокото ниво од почетокот на март, кога секторот го потресе неуспехот на неколку банки.

„Аналитичарите ги намалија проценките, па банките можеа позитивно да изненадат“

Морган Стенли (Morgan Stanley), Банката на Америка (Bank of America), Банката на Њујорк Мелон (Bank of New York Mellon) и голем број други банки вчера објавија подобри квартални оперативни резултати од очекуваните. Опкружувањето со покачени каматни стапки, стабилен пазар на труд и економски раст го фаворизира бизнисот на банките.

„Сите банки кои објавија резултати денес постигнаа повисоки профити и повисоки приходи од очекуваните. Аналитичарите ги намалија своите проценки, па банките можеа позитивно да изненадат“, објаснува Тим Гриски, стратег во Ingalls & Snyder.

Се очекува ФЕД уште еднаш да ги зголеми каматните стапки овој месец

Покрај банкарскиот сектор, вчера силно порасна и акциите на технолошките компании, за 1,3 отсто, при што цената на акциите на „Мајкрософт“ скокна за речиси 4 отсто, на рекордни нивоа.

Позитивно на пазарот влијаеше и информацијата за натамошен раст на потрошувачката на мало, но побавен од очекуваното. Ова значи дека инфлациските притисоци би можеле дополнително да ослабат и дека американската централна банка наскоро би можела да го прекине циклусот на зголемување на каматните стапки.

Се очекува дека ФЕД овој месец повторно ќе ги зголеми каматните стапки за 0,25 процентни поени и дека ова ќе биде последното зголемување во циклусот, кој трае повеќе од една година.

Доларот благо зајакна, цената на нафтата падна

А на валутните пазари благо порасна вредноста на доларот во однос на кошничката на валути. Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 99,94 поени, додека вчера во овој момент изнесуваше 99,84 поени.

Истовремено, курсот на доларот во однос на јапонската валута порасна од вчерашните 138,65 на 138,85 јени.

И американската валута зајакна во однос на европската, па цената на еврото се лизна на 1,1230 долари, додека вчера во ова време беше 1,1256 долари.

Цените на нафтата, пак, загубија дел од вчерашните добивки. Цената на барелот на лондонскиот пазар утрово се лизна за 0,26 отсто, на 79,42 долари, додека на американскиот пазар цената на барелот се намали за 0,46 отсто, на 75,45 долари.