Кина престана да објавува податоци за невработеноста кај младите, откако достигна рекорди

Кина го прекина објавувањето на месечните податоци за невработеноста кај младите луѓе, откако оваа бројка достигна последователни рекорди во последните месеци во услови на поширок економски пад.

Веста, која наиде на непосредна реакција и потсмев на социјалните мрежи, беше објавена од Националното биро за статистика (НБС) во вторникот, кога ја објави својата редовна серија месечни економски показатели. Претходно, НБС ги објавуваше стапките на невработеност во урбаните средини за млади од 16 до 24 години секој месец.

Фу Лингхуи, портпарол на НБС, објасни дека тоа е затоа што сегашната статистика „треба да се подобри“.

Бројот на ученици во возрасната група порасна во последните години и нивната главна задача треба да биде да студираат, а не да бараат работа, рече тој.

„Дали треба да се вклучат и студентите кои бараат работа пред дипломирањето… е нешто за кое луѓето имаат различни погледи. Потребно е дополнително истражување“, додаде тој.

Дефинирањето на старосниот опсег на „младите баратели на работа“, исто така, бара дополнително проучување, бидејќи младите сега поминуваат повеќе години на училиште, додаде тој.

НБС сега ќе спроведе „длабинско истражување“ за да ја подобри својата методологија, рече Фу, додавајќи дека податоците ќе бидат објавени повторно откако ќе заврши процесот. Тој не даде временска рамка.

Суспензијата доаѓа откако стапката на невработеност кај младите во Кина достигна последователни рекорди во последните месеци. Од април до јуни, стапката на невработеност за младите од 16 до 24 години достигна 20,4%, 20,8% и 21,3%, соодветно.

Објавата брзо стана тренд тема на интернет.

„Она што тие навистина сакаа да го кажат е дека сегашните податоци се премногу грди, да не ги гледаме засега“, се вели во коментарот со повеќе од 9.000 гласа „за“ на страницата за микроблогирање „Веибо“, каде хаштагот за веста собра 100 милиони прегледи.

Рекордни 11,6 милиони дипломирани студенти барале работа оваа година. Тие се соочуваат со мрачни изгледи бидејќи кинеската економија го загуби моментумот по вториот квартал, кога згасна растот по пандемијата.

Економијата забавува

Податоците од вторникот, исто така, укажуваат на уште еден месец на слаб раст на втората по големина светска економија.

Потрошувачката, индустриското производство и инвестициите во основни средства се дополнително забавени во јули од пред една година, според НБС.

Продажбата на мало се зголеми за 2,5% минатиот месец во однос на претходната година, забавувајќи се од порастот од 3,1% забележан во јуни. Тоа беше најслабиот раст на потрошувачката од декември, кога Кина ги укина ограничувањата за пандемијата.

Индустриското производство исто така беше под очекуваното. Тоа беше зголемено за 3,7% во јули во однос на претходната година, во споредба со растот од 4,4% во јуни.

Инвестициите во основни средства се зголемија за 3,4% во јули, во споредба со растот од 3,8% забележан во јуни.

Економијата се бори со слабата извозна побарувачка од глобалните пазари и тековната криза на недвижностите.

„Со оглед на финансиските проблеми како што е ‘Кантри Гарден’, кои веројатно ќе влијаат на пазарот на домување во блиска иднина, постои реален ризик економијата да западне во рецесија доколку наскоро не се зголеми поддршката“, велат аналитичарите од Капитал економикс во истражувачка белешка во вторник.

Зголемени напори

Креаторите на политики презедоа некои чекори за поддршка на економијата, иако економистите велат дека треба да се направи многу повеќе.

Во вторникот, Народната банка на Кина неочекувано го намали својот среднорочен кредитен капацитет (MLF) за 15 базични поени на 2,5%. Исто така, ја намали седумдневната стапка на обратно репо за 10 базични поени, која сега изнесува 1,8%.

„Од макро перспектива, денешните политички одлуки се донекаде корисни“, рече Роберт Карнел, регионален шеф за истражување за Азија-Пацифик во ИНГ (ING Group).

Но, тие не ја менуваат играта, рече тој.

Аналитичарите од „Капитал економикс“ очекуваат наскоро да дојде до дополнително намалувања на стапките. Сепак, кратењата веројатно ќе бидат премали за да ја оживеат побарувачката за кредити, бидејќи креаторите на политиките досега бавно ја развиваа значајната фискална поддршка, велат тие.

„Доколку официјалните лица не дејствуваат посилно наскоро, нашите очекувања за скромно враќање на политиката подоцна оваа година може да бидат премногу оптимистички“, додаваат тие.

Во неделата, кинескиот кабинет издаде 24 упатства за привлекување странски инвестиции и решавање на некои од најтешките прашања за инвеститорите.

Мерките вклучуваат нудење подобар даночен третман за прекуокеанските компании, олеснување на странците да добијат визи и олабавување на правилата за пренос на податоци во странство.