Кина намерно урна брана поради големите поплави

Властите во централна Кина рано утрово ја урнаа браната на реката Чуе во провинцијата Анхуи, по што нивото на водата се очекува да се спушти за повеќе од 70 сантиметри.

Според кинеската државна телевизија ЦЦТВ, браната била урната со експлозив, со цел да се ослободи огромно количeство вода од неа, поради големите поплави низ целата земја, кои однесоа многу животи.

Нивото на водата на многу реки, вклучувајќи го и силниот Јангце, е невообичаено високо оваа година поради обилните дождови.

Уривањето на браните и насипите поради испуштање вода беше екстремен одговор што Кинезите го користеа во 1998 година за време на најголемите поплави во кои загинаа над 2.000 луѓе, а беа уништени речиси три милиони домови.

Сезонските поплави погодуваат големи делови на Кина секоја година, особено нејзините централни и јужни региони, но беа особено сериозни ова лето. Повеќе од 150 луѓе се убиени или исчезнати во поплавите и лизгањето на земјиштето предизвикано од поројните дождови.

Евакуирани се околу 1,8 милиони луѓе, а директните загуби што им се припишуваат на поплавите се проценуваат на повеќе седум милијарди долари, според Министерството за вонредни ситуации.

Големите градови досега се поштедени, но загриженоста се зголеми за Вухан и другите метрополи низводно, каде живеат десетици милиони луѓе. (Бета)