Кавга меѓу коалициските партнери во Италија, можни се предвремени избори

Италијанскиот заменик-премиер Луиџи Ди Мајо денеска го повика на средба својот владин партнер и втор заменик премиер Матео Салвини во своевидна мировна мисија што следи по взаемните обвинувања од кои прозлезе загриженоста за стабилноста на италијанската владеачка коалиција.

-Треба да разговараме и денеска да се видиме, рече Ди Мајо во интервју за државната РАИ3.

Првиот човек на „Движењето 5 ѕвезди“, истовремено, потврди дека не е на повидок крај на владеачката коалиција.

-Владата не е доведена во прашање, рече тој.

Ди Мајо и Салвини, лидерот на екстремно десничарската партија Лига, пред една година, по парламентарните избори, кога немаше апсолутен победник, создадоа неочекуван сојуз. Нивните врски, меѓутоа, беа нарушени откако партијата „Лига“ на мајските избори за Европскиот парламент оствари подобар резултат од „Движењето 5 ѕвезди“, па Салвини потоа почна да се однесува како вистински премиер.

Изборот на Урсула фон дер Лајен за нов претседател на Европската комисија го предизвика најновиот судир меѓу двајцата сојузници, со тоа што Ди Мајо го поддржа, а Салвини беше против нејзиниот избор.

Салвини, доцна синоќа гостуваше на едно телевизиско шоу, каде демантираше дека планира да му ја предаде својата оставка на претседателот на државата.

Италијанските медиуми денеска нагаѓаа за можноста Италија да има предвремени избори уште оваа есен.

Ди Мајо денеска порача дека сака да се сретне со Салвини подоцна во текот на денот за да ги договорат отстапките.

-Зрелите луѓе е подобро да се видат отколку да разговараат преку медиумите, рече Ди Мајо.